Фотафакт: у Ракаве адсвяткавалі Купалле

Купалле – адно з самых старажытных народных святаў, прысвечанае сонцу і росквіту зямлі. Звязана яно з летнім сонцаваротам. Менавіта ў гэты час сонца дасягае свайго апагею і паварочвае на восень. Як адсвяткавалі старажытнае свята ў аграгарадку Ракаў Валожынскага раёна, паглядзеў фотакарэстандэнт Sputnik Альфрэд Мікус.

Ракаўцы ладзяць купальскае свята штогод. Спачатку танчаць, спяваюць і плятуць вянкі ў вёсцы, а потым накіроўваюцца на старажытнае гарадзішча каля ракі Іслач.

Тут дзяўчаты і хлопцы ў народных строях і з вянкамі на галаве распальваюць вогнішча, танчаць вакол яго і спальваюць адзін з вянкоў. Усё гэта адбываецца пад гукі абрадавых песняў, якія славяць росквіт прыроды і ўшаноўваюць нашых продкаў.