МІНСК, 7 ліп - Sputnik. Беларускі прэзідэнт Аляксандр Лукашэнка адкрыта распавёў аб пачуццях, якія адчувае, калі прыязджае на сваю малую радзіму.
У суботу кіраўнік дзяржавы адкрываў у родным аграгарадку фестываль "Александрыя збірае сяброў - 2019". Ён прызнаўся, што кожны прыезд сюды для яго вельмі хвалюючы.
"Пачуццё страшнага хвалявання. Калі ты дасягаеш пэўных вышынь, прабачце за нясціпласць, становішся вядомым чалавекам, тады прыязджаць дадому, дзе ты нарадзіўся і вырас, і сустракацца сам-насам з людзьмі, якія ведаюць цябе лепш, чым хто-небудзь у свеце, заўсёды не проста хвалююча - гэта страшна хвалююча", - цытуе словы прэзідэнта яго прэс-служба.
Лукашэнка дадаў, што паняцце малой радзімы для людзей з вялікіх гарадоў і сталіцы не напоўнена такім сэнсам, як для тых, хто нарадзіўся і вырас у невялікіх паселішчах. Ён адзначыў, што для любога чалавека важна не губляць сувязь з роднымі мясцінамі і людзьмі, якія там жывуць.
"Калі ён не губляе гэтыя пачуцці, значыць, ён чалавек. Калі ён іх страціў і ўзнёсся занадта высока, забыўшыся пра людзей, ён перастае быць чалавекам", - акцэнтаваў беларускі лідэр.
Свята ў Александрыі падтрымлівае тэму малой радзімы, што знайшло адлюстраванне ў творчасці музыкаў, якія стварылі альбом "куточак Беларусі", паведамляе прэс-служба прэзідэнта.
Фестываль "Александрыя збірае сяброў - 2019" завяршаецца ў Шклоўскім раёне ў нядзелю вялікім гала-канцэртам творчых калектываў з Беларусі і Расіі.
