МІНСК, 17 ліп - Sputnik. Рашэнне аб стварэнні Асацыяцыі ВНУ Беларусі і Расіі прынята ў Санкт-Пецярбургу ў рамках VI Форуму рэгіёнаў дзвюх краін.
VI Форум рэгіёнаў Беларусі і Расіі праходзіць у гэтыя дні ў паўночнай сталіцы РФ. У рамках мерапрыемства на пляцоўцы Санкт-Пецярбургскага дзяржаўнага ўніверсітэта прамысловых тэхналогій і дызайну адбыўся Форум рэктараў ВНУ дзвюх краін.
"Трэба прызнаць, што свет стаў сеткавым. З намі або без нас, але ён такі, гэта аб'ектыўная рэальнасць. І навукова-адукацыйнай супольнасці важна быць у авангардзе гэтых працэсаў. Наша ўзаемадзеянне павінна насіць не разавы, кропкавы характар, а быць сістэмным і эфектыўным па ўсіх сумесных праектах і праграмах. Хочацца, каб гэты настрой і вынікі абмеркаванняў, якія праходзяць на гэтай пляцоўцы, вы транслявалі ў сябе ва ўніверсітэтах, каб на практыцы запусціць і ўзмацніць узаемадзеянне", - адзначыла на мерапрыемстве намеснік кіраўніка Міністэрства навукі і вышэйшай адукацыі Расіі Марына Бароўская.
У рамках Форуму рэктары абмеркавалі прыклады супрацоўніцтва, праекты і перспектывы па ўзаемадзеянні, а таксама іншыя пытанні. Адзначылі асобна і неабходнасць стварэння новай міжнароднай арганізацыі ўніверсітэтаў. Сёння ВНУ Беларусі і Расіі ўзаемадзейнічаюць у рамках Еўразійскай асацыяцыі. Агульнага жа праекту ва ўніверсітэтаў дзвюх краін не было.
"Сёння Еўразійская асацыяцыя ўніверсітэтаў - гэта аўтарытэтная і ўплывовая міжнародная арганізацыя ўніверсітэтаў. У яе ўваходзяць нацыянальныя ўніверсітэты усіх краін СНД, вядучыя рэгіянальныя ўніверсітэты і вышэйшыя навучальныя ўстановы краін Еўразійскай прасторы. Разам з тым платформы для развіцця супрацоўніцтва паміж універсітэтамі толькі Расіі і Беларусі да цяперашняга часу не існавала", - выказалася Бароўская.
Як адзначыла намеснік міністра, рашэнне аб стварэнні Асацыяцыі ВНУ Расіі і Беларусі дазволіць выкарыстаць патэнцыял універсітэтаў і іх супрацоўніцтва ў інтарэсах паглыблення інтэграцыі і фарміравання агульнай адукацыйнай прасторы Саюзнай дзяржавы.
Мяркуецца, што ў рамках Асацыяцыі штогод будзе праводзіцца Форум рэктараў ВНУ дзвюх краін. Падпішуць дакумент аб стварэнні новага саюза ўжо ў бліжэйшыя дні на Форуме рэгіёнаў.
