МІНСК, 19 ліп - Sputnik. Цёплае і пераважна без ападкаў надвор'е чакаецца ў Беларусі ў выхадныя, пра гэта паведамілі ў рэспубліканскім гідраметцэнтры.
У пятніцу пасля абеду на паўночным усходзе могуць прайсці кароткачасовыя дажджы і магчымы парывісты вецер. Пацяплее ў другой палове дня ад +18°С па паўночным усходзе да +26°С па паўднёвым захадзе краіны.
"20 ліпеня (у суботу) надвор'е на тэрыторыі рэспублікі ў асноўным будзе вызначаць вобласць павышанага атмасфернага ціску", - паведамілі ў Белгідраметцэнтры.
Чакаецца пераменная воблачнасць, пераважна без ападкаў, кароткачасовыя дажджы могуць прайсці толькі ў асобных раёнах Брэсцкай вобласці. Уначы будзе +8..+14°С, а днём паветра прагрэецца ад +21°С па паўночным усходзе да +28°С па паўднёвым захадзе краіны.
"21 ліпеня (у нядзелю) на большай частцы тэрыторыі рэспублікі захаваецца ўплыў вобласці павышанага атмасфернага ціску, толькі днём з тэрыторыі Польшчы на захад краіны перамесціцца атмасферны фронт", - растлумачылі сіноптыкі.
У гэты дзень будзе воблачна з праясненнямі, кароткачасовыя дажджы пройдуць толькі месцамі на захадзе Беларусі, месцамі магчымыя і навальніцы з парывістым ветрам. Раніцай можа назірацца слабы туман. У начныя гадзіны тэмпература будзе знаходзіцца ў межах +10..+17°С, а пасля абеду дасягне +23..+29°С, а па Брэсцкай вобласці падымецца нават да +30°С.
Згодна з папярэднімі прагнозамі, будучы працоўны тыдзень у Беларусі таксама будзе па-летняму гарачым.
