МІНСК, 5 жні - Sputnik. Беларусь разлічвае на высокія тэмпы супрацоўніцтва з Еўрапейскім інвестыцыйным банкам, заявіў Аляксандр Лукашэнка на сустрэчы з віцэ-прэзідэнтам ЕІБ Вазілам Худаком.
Паводле яго слоў, гісторыя супрацоўніцтва афіцыйнага Мінска і ЕІБ даволі кароткая, але пры гэтым досыць эфектыўная для абодвух бакоў.
"Літаральна 1,5 гады - і 335 мільёнаў еўра. Гэта - вельмі вялікі інвестыцыйны партфель Еўрапейскага інвестыцыйнага банка ў Беларусі", - адзначыў кіраўнік дзяржавы.
На яго думку, "інтэнсіўнасць гэтага супрацоўніцтва і той узровень, на які выйшлі, яны беспрэцэдэнтныя". Праекты, што рэалізуюцца ў нашай краіне з прыцягненнем еўрапейскіх інвестыцый, вельмі сур'ёзныя.
Аляксандр Лукашэнка нагадаў аб праекце рэканструкцыі дарогі ў бок мяжы з Літвой. Гэта павінна зрабіць прывабным балтыйскі напрамак з пункту гледжання лагістыкі.
"Мы разумеем, што для Еўропы, Расіі, Кітая гэта тысячакіламетровае акно праз Беларусь вельмі важна. І тое, што мы сёння тут з вамі робім, - гэта не толькі для Беларусі, гэта для ўсяго свету найважнейшыя артэрыі", - канстатаваў беларускі лідар.
Пры гэтым ён звярнуў увагу, што ў краіне ўжо многія дарогі адрамантаваны, у прыватнасці тыя, якія злучаюць сталіцу і абласныя цэнтры.
"Інфраструктура выдатная. Думаю, з часам мы задзейнічаем і дарогу Поўнач-Поўдзень - гэта Санкт-Пецярбург-Адэса. Яна ў нас у вельмі добрым стане ў Беларусі, але ў іншых месцах за межамі ёсць праблемы. Думаю, гэта дарога будзе запатрабаванай", - лічыць Аляксандр Лукашэнка.
Пасля чаго закрануў пытанне ўдзелу Еўрапейскага інвестыцыйнага банка ў праектах, якія закліканы падтрымаць навакольнае асяроддзе.
"Я чалавек ад прыроды, чалавек вясковы. Для мяне гэта важнейшы аспект", - запэўніў ён. Прычым быў вымушаны прызнаць, што, нягледзячы на багацце лесу ў краіне, "мы спажываем для ацяплення больш за ўсё прыродны газ, а дзесьці яшчэ і нафтапрадукты. Гэта ненармальна".
У завяршэнне беларускі прэзідэнт запэўніў Вазіла Худака, што гатовы выступіць гарантам пры рэалізацыі новых праектаў.
У сваю чаргу віцэ-прэзідэнт ЕІБ адзначыў, што праекты банка разлічаны на інвестыцыі даўжынёю ў 15-25 гадоў.
"Такія доўгія інвестыцыі можна ўкладваць толькі ў тыя краіны, дзе ёсць устойлівае развіццё, ёсць аптымізм інвестараў у тым, што краіна сапраўды будзе развівацца і заставацца стабільнай. Гэта вельмі важна ў сённяшнім свеце, які поўны розных пагроз і нестабільнасці", - падкрэсліў інвестыцыйны банкір.
