МІНСК, 27 жні - Sputnik. Больш за 40% школьнікаў па выніках міністэрскага кантролю не пацвердзілі свае школьныя адзнакі па прадметах, заявіў у панядзелак журналістам кіраўнік Мінадукацыі Беларусь Ігар Карпенка.
Пытанні атэстацыі школьнікаў, як бягучай, так і выніковай, падымаліся ўладамі неаднаразова. Так, пытанні выклікаюць і выпускныя экзамены, і уступныя іспыты - цэнтралізаванае тэсціраванне.
Зараз Міністэрства адукацыі прапануе ўкараненне новага незалежнага нацыянальнага экзамену, які дапамог бы лепш ацэньваць узровень ведаў выпускнікоў. Як распавёў Карпенка, у мінулым годзе ведамства праводзіла міністэрскі кантроль у выглядзе незалежных зрэзаў.
"43% школьнікаў не проста не пацвердзілі свае вынікі, але і пагоршылі нават некаторыя вынікі. Узровень выкладання трэба падымаць, удасканальваць методыкі, працаваць на вынік, а не толькі на ацэнкі", - выказаўся міністр, яго словы прывялі ў эфіры тэлеканала АНТ.
Пра магчымасць змены сістэмы паступлення ў ВНУ казаў у панядзелак на сустрэчы з міністрам адукацыі Аляксандр Лукашэнка. Беларускі лідар прызнаўся, што, на яго думку, сёння не хапае "вочнай" формы экзаменаў: калі веды абітурыентаў ацэньваюць выкладчыкі.
"Калі б мне прыйшлося здаваць тэсціраванне, наўрад ці ў мяне вынік быў бы лепш, чым пры сумоўі з выкладчыкам", - выказваўся прэзідэнт.
Упершыню ідэя ўкаранення незалежнага экзамену замест цэнтралізаванага тэсціравання выказвалася Мінадукацыі некалькі гадоў таму, аднак канчатковае рашэнне пакуль не прынята. Нагадаем, цэнтралізаванае тэсціраванне было ўкаранёна ў Беларусі ў 2004 годзе.
