МІНСК, 21 вер - Sputnik. Прэзідэнт Беларусі Аляксандр Лукашэнка ад імя беларускага народа і сябе асабіста павіншаваў свайго армянскага калегу Армена Саркісяна з Днём Незалежнасці. Пра гэта паведамілі ў прэс-службе кіраўніка дзяржавы.
Лукашэнка адзначыў, што Арменія - гэта годны член сусветнай супольнасці, а таксама актыўны ўдзельнік інтэграцыйных працэсаў, які ўпэўнена ідзе па шляху ўмацавання дзяржаўнасці і забеспячэння ўстойлівага эканамічнага росту.
"Перакананы, што дзякуючы адкрытаму і канструктыўнаму характару беларуска-армянскага палітычнага дыялогу двухбаковыя адносіны будуць і ў далейшым паспяхова развівацца", - сказана ў віншавальным пасланні прэзідэнта Беларусі.
Варта дадаць, што дыпламатычныя адносіны паміж Беларуссю і Арменіяй устаноўлены 11 чэрвеня 1993 года. Краіны за гэты час падпісалі каля 80 пагадненняў у розных сферах супрацоўніцтва.
У студзені-лістападзе 2018 года тавараабарот паміж краінамі склаў 45,8 мільёна долараў, у тым ліку экспарт - 34,2 мільёна долараў.
Аснова беларускага экспарту ў Арменію - гэта малочная і мясная прадукцыя, шыны, трактары і седлавыя цягачы, мэбля і яе часткі, папера і кардон, пліты драўнянавалакністыя, лекавыя сродкі.
З Арменіі, галоўным чынам, у нашу краіну імпартуюцца спіртныя напоі, ювелірныя вырабы, лекі.
У апошнія гады Арменія стала больш актыўна інвеставаць у эканоміку Беларусі. Прамыя назапашаныя армянскія інвестыцыі ў Беларусь складаюць 17,1 мільёна долараў.
У 2018 годзе ў эканоміку Беларусі прыцягнута інвестыцый з Арменіі на суму 7,6 мільёна долараў, у тым ліку прамых - на суму 7,5 мільёна даляраў.
