МІНСК, 26 вер - Sputnik. Адмова Беларусі размяшчаць на сваёй тэрыторыі расійскую ваенную базу - эпізод непрыемны, аднак галоўнае ў тым, што Мінск падтрымлівае саюзніцкія адносіны з Масквой, заявіў міністр замежных спраў Расіі Сяргей Лаўроў.
Раней у СМІ неаднаразова гучала тэма магчымасці з'яўлення ў Беларусі расійскай авіяцыйнай базы, пазней перамовы па гэтым пытанні ўздымалі Мінск і Масква. Аднак у 2015 годзе прэзідэнт рэспублікі Аляксандр Лукашэнка заявіў, што авіябаза РФ у Беларусі не патрэбна як Мінску, так і Маскве і назваў палітычнай шуміху, якую паднялі журналісты на гэтую тэму.
"Гэта сапраўды непрыемны эпізод. Але галоўнае не форма, а змест. А па змесце прэзідэнт Беларусі Аляксандр Рыгоравіч Лукашэнка неаднаразова казаў, у тым ліку адказваючы на пытанне пра базу, што Беларусь - саюзнік Расіі на ўсе 100%", - заявіў Лаўроў у інтэрв'ю выданню "Коммерсант".
Ён дадаў, што беларускае войска можна разглядаць як сродак абароны інтарэсаў як Беларусі, так і Расіі, а таксама агульнай тэрыторыі.
Лаўроў заўважыў, што Масква таксама не на 100% падзяляе знешнюю палітыку Беларусі, аднак у партнёраў па Саюзнай дзяржаве існуе Праграма сумесных дзеянняў, у якой распісаны ўсе крокі, якія будуць прымацца.
"Па знешняй палітыцы ў чыстым выглядзе ў нас ёсць Праграма сумесных дзеянняў. Такога ў нас больш ні з кім няма", - падкрэсліў міністр.
