МІНСК, 1 кас - Sputnik. У размяшчэнні расійскай ваенна-паветранай базы на тэрыторыі Беларусі "няма на практычнага, ні палітычнага, ні ваеннага сэнсу", пра гэта заявіў міністр замежных спраў краіны Уладзімір Макей у інтэрв'ю РБК.
"З улікам развіцця сучасных тэхналогій у гэтым няма сэнсу", - сказаў кіраўнік дыпведамства.
Акрамя таго, па словах Макея, у выпадку размяшчэння Беларуссю на сваёй тэрыторыі нейкіх дадатковых ваенных аб'ектаў, наўрад ці гэта спрыяла б умацаванню стабільнасці і бяспекі ў рэгіёне.
У той жа час міністр падкрэсліў, што рашэнне Мінска не размяшчаць расійскую базу не звязана з "уплывам нейкіх вонкавых сіл" і залежыць толькі ад нацыянальных інтарэсаў.
Нагадаем, што раней кіраўнік расійскага дыпведамства Сяргей Лаўроў назваў адмову Беларусі размяшчаць расійскую ваенную базу "непрыемным эпізодам". Пры гэтым міністр адзначыў, што Мінск падкрэслівае саюзніцкі характар узаемадзеяння з Масквой.
"Па знешняй палітыцы ў чыстым выглядзе ў нас ёсць Праграма сумесных дзеянняў. Такога ў нас больш ні з кім няма", - сказаў Лаўроў.
Кіраўнік МЗС Расіі заўважыў, што Масква не на 100% падзяляе знешнюю палітыку Мінска, аднак у партнёраў па Саюзнай дзяржаве існуе Праграма сумесных дзеянняў, дзе распісаны ўсе крокі, якія будуць прымацца.
Тэма магчымасці стварэння ў Беларусі расійскай авіябазы падымалася неаднаразова, абодва бакі заяўлялі, што перамовы на гэтую тэму вядуцца. Пры гэтым у 2015 годзе прэзідэнт Аляксандр Лукашэнка заявіў, што расійская авіябаза ў Беларусі не патрэбна як Мінску, так і Маскве, і назваў палітычнай шуміху, паднятую журналістамі на гэтую тэму.
