МІНСК, 4 кас - Sputnik. Прэс-сакратар прэзідэнта Расіі Уладзіміра Пуціна Дзмітрый Пяскоў распавёў, як расійскі лідар будзе адзначаць свой дзень нараджэння.
У панядзелак 7 кастрычніка Пуціну споўніцца 67 гадоў.
Як распавёў у пятніцу Пяскоў, расійскі лідар будзе адзначаць дзень нараджэння на прыродзе ў коле самых блізкіх. Падобным чынам, да слова, Пуцін адзначыў і папярэдні дзень нараджэння.
Расійскаму лідару не заўсёды ўдаецца правесці свой дзень нараджэння ў коле сям'і і блізкіх, часам гэтая дата выпадае на розныя сустрэчы, у тым ліку і замежныя. У 2017 годзе, да прыкладу, Пуцін у гэты дзень удзельнічаў у аператыўнай нарадзе з членамі савета бяспекі Расіі і правёў шэраг тэлефонных перамоваў з прэзідэнтамі некалькіх краін. А ў 2013-м ён знаходзіўся на востраве Балі, дзе ўдзельнічаў у саміце Азіяцка-Ціхаакіянскага супрацоўніцтва.
Тры гады таму Пуціну ўдалося адзначыць свой дзень нараджэння ў коле родных, а ў 2014-м ён упершыню за год ўзяў выхадны і паляцеў у сібірскую тайгу. Праз два дні, выступаючы на пасяджэнні Савета па развіцці спорту, прэзідэнт распавёў, што хадзіў па гарах і зараз у яго баляць ногі.
