МІНСК, 15 кас - Sputnik. Праграма скрынінга рака малочнай залозы ў Беларусі будзе пашырана, пра гэта паведаміў журналістам у аўторак намеснік галоўнага ўрача па арганізацыйна-метадычнай рабоце 34-й цэнтральнай раённай клінічнай паліклінікі Савецкага раёна Мінска Вадзім Касцюкоў.
"У Мінску толькі 34-я паліклініка ўдзельнічае ў праграме скрынінга рака малочнай залозы. Але калі раней яна была і адзінай у краіне, то цяпер у кожнай вобласці ёсць бальніцы, якія бяруць удзел у праекце", - паведаміў Касцюкоў.
Паводле яго слоў, спецыфіка працы ў рэгіёнах прыкметна адрозніваецца ад Мінска. Аднак праца ў гэтым напрамку працягваецца.
"Думаю, у бліжэйшы час ужо большасць устаноў будуць датычныя да гэтага працэсу. Не магу назваць тэрміны, можа быць, год, можа, два", - выказаў меркаванне ён.
Спецыялісты Мінскага гарадскога клінічнага анкадыспансера таксама падзяліліся статыстыкай захворвання ў сталіцы. Так, па дадзеных медыкаў, у мінулым годзе такі дыягназ, як рак малочнай залозы паставілі 1134 мінчанкам, а за дзевяць месяцаў 2019 году - 817.
"Адна з асноўных задач лекараў - ранняя дыягностыка пухліны, гэта дазваляе своечасова пачаць спецыяльнае лячэнне і атрымаць добры вынік. Нягледзячы на ўсе намаганні, працэнт запушчаных пухлін (трэцяя і чацвёртая стадыі) усё ж застаецца досыць высокім - у некаторых раёнах горада ён дасягае 35%. Абсталявання хапае, як і вопытных рэнтгенолагаў. Але ёсць недастатковая матываванасць саміх пацыентак", - распавёў загадчык анкахірургічным аддзяленнем №1 дыспансэра Аляксандр Гладышаў.
Анколагі адзначаюць, што ва ўсім свеце (і ў Беларусі ў тым ліку) прыкметная тэндэнцыя да амаладжэння рака малочнай залозы. Акрамя таго, павялічылася колькасць пацыентак, у якіх анкалогія развіваецца альбо на фоне цяжарнасці, альбо ў бліжэйшыя тэрміны пасля родаў.
Спецыялісты нагадваюць пра неабходнасць штомесячнага самаабследавання малочных залоз, а таксама рэгулярнага абследавання ў лекараў. Ва ўзросце рызыкі (пік захворвання - 45-70 гадоў) неабходна сістэматычна праходзіць мамаграфію.
