МІНСК, 16 кас - Sputnik. Студэнты Белдзяржуніверсітэта атрымалі ўзнагароды рознай вартасці на XII Міжнароднай IT-алімпіядзе "ІТ-Планета 2018/2019", паведамілі Sputnik у прэс-службе ВНУ.
Міжнародная IT-алімпіяда прайшла ў Расіі, удзел у ёй прымалі студэнты шэрагу краін свету.
Па выніках алімпіяды студэнцкая каманда БДУ заваявала ўзнагароды рознай вартасці. Так, аспірант хімічнага факультэта Яўген Бандарэнка стаў срэбным прызёрам у конкурсе "Робафабрыка" ў намінацыі "Выраб" за распрацоўку прыбора для аналізу спектру выпраменьвання.
Таксама зборная ўніверсітэта па выніках выступленняў на алімпіядзе прызнана чэмпіёнам Беларусі сярод 25 каманд рэспублікі.
Алімпіяда арганізавана пры падтрымцы Міністэрства адукацыі і навукі Расіі, Міністэрства сувязі і масавых камунікацый Расіі, а таксама Агенцтва стратэгічных ініцыятыў па прасоўванні новых праектаў у напрамку "Маладыя прафесіяналы".
