МІНСК, 31 кас - Sputnik. Пасаду кіраўніка па ваенна-патрыятычным выхаванні плануецца ўвесці ў школах. Пра гэта міністр адукацыі Ігар Карпенка заявіў на калегіі ведамства "Аб выкананні даручэнняў кіраўніка дзяржавы ў сістэме адукацыі".
"Кіраўніком дзяржавы пастаўлена задача ўзмацніць выхаваўчую працу з падлеткамі і моладдзю. Педагогам важна фарміраваць светапогляд падрастаючага пакалення, надаваць увагу яго грамадзянскаму і патрыятычнаму выхаванню, падрыхтоўцы да далейшага самастойнага жыцця", - адзначыў Карпенка.
Паводле яго слоў, для ўдасканалення метадаў такой працы цяпер у міністэрстве разглядаюць пытанне аб "увядзенні ў школах пасады кіраўніка па ваенна-патрыятычным выхаванні". Міністр адукацыі перакананы, што формы работы ў гэтым кірунку могуць быць розныя.
"Гэта клопат пра ветэранаў, добраўпарадкаванне пахаванняў і воінскіх магіл, вывучэнне гісторыі воінскіх часцей і злучэнняў, партызанскіх атрадаў і падпольных груп у гады Вялікай Айчыннай вайны на тэрыторыі рэгіёнаў, арганізацыя "зорных паходаў", - прыводзіць тлумачэнні Карпенка БелТА.
На яго думку, гэта далёка не ўвесь пералік маштабнай практычнай працы, у якой павінен удзельнічаць кожны школьнік, бо "менавіта гэтая праца нясе ў сабе зарад патрыятызму і гонару за краіну".
Трывожныя кнопкі з'явяцца амаль усюды ў 2019-м
Карпенка таксама паведаміў, што да канца года трывожныя кнопкі будуць устаноўлены практычна ва ўсіх установах адукацыі. Тыпавыя ўнутраныя правілы распарадку для навучэнцаў ужо распрацаваны, акрамя таго, ведамства вывучыла выкананне даручэння па арганізацыі прапускнога рэжыму, а таксама абмежаванні выкарыстання мабільных тэлефонаў на ўроках у шэрагу школ.
"Калі на месцах не будуць прыняты меры па іх ужыванню, то гэта будуць усяго толькі чарговыя рэкамендацыі на паперы", - падкрэсліў Карпенка.
Ён таксама адзначыў, што сям'я і школа абавязкова павінны ўзаемадзейнічаць у пытаннях выхавання дзяцей, і заклікаў спыніць спрэчкі аб тым, "хто ж большы ў адказе".
"Школа павінна і вучыць і выхоўваць, а педагогі - несці адказнасць як за навучальныя дасягненні, так і за выхаванасць навучэнцаў. Нам трэба арганізаваць сямейнае выхаванне, і арганізуючым пачаткам павінна быць школа", - рэзюмаваў міністр адукацыі.
