МІНСК, 14 ліс - Sputnik. Чыгунку ў Нацыянальны аэрапорт "Мінск" могуць пабудаваць у Беларусі з удзелам Сусветнага банка, пра гэта паведамляе прэс-служба ўрада.
Пытанне будаўніцтва жалезнай дарогі ў аэрапорт закранулі на сустрэчы віцэ-прэм'ер Беларусі Уладзімір Кухараў і кіраўнік прадстаўніцтва Сусветнага банка ў рэспубліцы Алекс Крэмер.
"Мы хацелі б абмеркаваць пытанне, якое датычыцца нашай сумеснай працы па праекце будаўніцтва чыгуначных зносін паміж Мінскам і Нацыянальным аэрапортам. Гэта вельмі сур'ёзны праект, разлічваем, што зможам вывучыць гэта пытанне, каб у тым ліку з удзелам Сусветнага банка рэалізаваць гэты праект", - сказаў Кухараў.
Ён падкрэсліў, што будаўніцтва чыгункі дапаможа забяспечыць зручную сувязь з Нацыянальным аэрапортам Мінск, у якім паралельна пройдуць работы па будаўніцтве тэрмінала і ўзлётна-пасадачнай паласы.
Раней паведамлялася, што разглядаецца некалькі варыянтаў ажыццяўлення гэтага праекта. Так, можа быць пабудаваная новая чыгунка ўздоўж вуліцы Ваўпшасава, адгалінаванне ўздоўж трасы М2 на аэрапорт; таксама можа быць праведзена рэканструкцыя існуючай чыгуначнай веткі, якую выкарыстоўваюць для грузавых перавозак.
