МІНСК, 15 ліс - Sputnik. Беларусь плануе ўзмацніць ахову дзяржмяжы па контуры Чарнобыльскай зоны да 2021 года, заявіў у чацвер старшыня Дзяржпагранкамітэта рэспублікі Анатоль Лапо.
"Вельмі вялікае заражэнне на самой лініі мяжы, туды чалавек не павінен хадзіць. Мы зараз там ахоўваем беспілотнікам, але ў далейшым хочам цалкам у зоне адчужэння ўсталяваць камеры відэаназірання і стварыць цэнтр аператыўнага кіравання ў Хойніках", - паведаміў Лапо у інтэрв'ю тэлеканалу "Беларусь 1".
Для кантролю сітуацыі на гэтым участку мяжы будуць задзейнічаны шэсць аператараў, яны будуць бачыць, што адбываецца на участку мяжы працягласцю прыкладна ў 370 кіламетраў. У выпадку паступлення трывожных сігналаў, да месца прызначэння будуць адпраўляць тэхніку і спецыяльна навучаных людзей.
Неабходнасць узмацнення кантролю старшыня ДПК патлумачыў тым, што гэты ўчастак папулярны сярод "негатыўных элементаў", іх не спыняе нават шкода здароўю, якую яны могуць нанесці, знаходзячыся ў зоне падвышанай радыяцыі.
Турызм у зону стаў модным, туды едзе ўсё больш людзей, падкрэсліў Лапо.
"Людзі едуць па спецыяльных маршрутах, але пад выглядам гэтых людзей, ёсць жа і негатыўныя элементы", - адзначыў старшыня ДПК.
Чытайце таксама:
- Слухаць экскурсавода, не збіраць грыбы: як турысту паводзіць сябе ў зоне ЧАЭС
