МІНСК, 24 ліс - Sputnik. Мінскае "Дынама" стала першай камандай КХЛ, якая ў гэтым сезоне прапусціла 100 шайб.
Суботняя сустрэча дынамаўцаў у гасцях з "Авангардам" завяршылася перамогай мінскага клуба, але менавіта на ёй быў забіты соты гол у іх вароты. І гэта пры тым, што Юнас Энрот у гэтым паядынку 42 кідкі ўсё ж адбіў. "Юбілейнае" ўзяцце варот аформіў форвард "Авангарда" Кірыл Сямёнаў.
Зараз клуб з 25 ачкамі займае 10-е месца ў Заходняй канферэнцыі. Пры 100 прапушчаных шайбах мінчане забілі 71. На другім месцы па ліку прапушчаных шайбаў рыжскае "Дынама" (96), на трэцім - "Поўначсталь" (86).
Лідар па ліку ўзяццяў чужых варот - "Ак Барс": на яго рахунку 95 забітых шайбаў пры 47 прапушчаных, клуб займае першае месца ва Усходняй канферэнцыі.
