МІНСК, 13 сне - Sputnik. Урад Беларусі разлічвае на паскарэнне сертыфікацыі для паставак мяса, малочнай прадукцыі і птушкі ў В'етнам, пра гэта заявіў прэм'ер-міністр Беларусі Сяргей Румас.
Сёння кіраўнік беларускага ўрада правёў сустрэчу са старшынёй Нацыянальнага сходу В'етнама Нгуен Тхі Кім Нган. Ён пазітыўна ацаніў тэмп развіцця гандлёвага супрацоўніцтва паміж краінамі і адзначыў, што важна гэты тэмп захаваць, а таксама наладжваць сустрэчныя пастаўкі тавараў.
"Мы падтрымліваем сумесныя праекты па пастаўках в'етнамскага каучука ў Беларусь і пастаўкі традыцыйнай сельскагаспадарчай прадукцыі на наш рынак. У сувязі з гэтым мы б былі вельмі ўдзячныя за вырашэнне пытання аб хутчэйшай сертыфікацыі беларускіх мясамалочных і птушкагадоўчых прадпрыемстваў на права паставак у В'етнам сваёй прадукцыі", - адзначыў Сяргей Румас, яго словы прывяла БелТА.
У кастрычніку 2016 года ўступіла ў сілу пагадненне аб зоне свабоднага гандлю паміж Еўразійскім эканамічным саюзам і В'етнамам. На думку Сяргея Румаса, гэта адкрывае прынцыпова новыя магчымасці для гандлёва-эканамічнага супрацоўніцтва паміж Беларуссю і В'етнамам.
Беларусь гатова гандляваць з В'етнамам не толькі прадуктамі, але таксама і ўсімі відамі тэхнікі - грузавой, пасажырскай, кар'ернай, сельскагаспадарчай, а таксама працаваць над стварэннем сумесных прадпрыемстваў. На дадзены момант аснову тавараабароту дзвюх краін складаюць пастаўкі калійных угнаенняў, Беларусь, запэўнівае прэм'ер, гатова поўнасцю задаволіць патрэбнасці в'етнамскага рынку ў гэтым відзе прадукцыі.
Адным з перспектыўных напрамкаў супрацоўніцтва можа стаць узаемадзеянне ў навукова-тэхнічнай сферы. Румас прапанаваў звярнуць увагу на горна-абагачальнае абсталяванне Беларусі, а таксама напрацоўкі ў сферах мікрабіялогіі, новых матэрыялаў, медыцыны, фармацэўтыкі. Яшчэ адна патэнцыйна цікавая сфера для супрацоўніцтва - распрацоўка беспілотных лятальных комплексаў і тэхналогій ліквідацыі наступстваў надзвычайных сітуацый.
