МІНСК, 4 сту - Sputnik. Пералік тэрыторый з напружанай сітуацыяй на рынку працы на 2020 год зацверджаны ў Беларусі, адпаведны дакумент размешчаны на Нацыянальным прававым інтэрнэт-партале ў суботу.
Пералік зацверджаны пастановай Саўміна №921 ад 27 снежня мінулага года. У спісе 29 тэрыторый: 28 раёнаў і горад Бабруйск. Для параўнання, годам раней у спісе было амаль удвая больш тэрыторый (53).
Так, да праблемных тэрыторый Брэсцкай вобласці аднесены Беразоўскі, Іваноўскі і Лунінецкі раёны. Выпраўляць сітуацыю на рынку працы ў Гомельскай вобласці трэба будзе ў Добрушскім, Рагачоўскім, Хойніцкім раёнах.
У Гродзенскай вобласці гэта Зэльвенскі і Свіслацкі раёны. А на Магілёўшчыне ў пералік увайшлі Дрыбінскі і Круглянскі раёны, а таксама горад Бабруйск.
Найбольшая колькасць праблемных тэрыторый у Віцебскай і Мінскай вобласці: па дзевяць. У першым рэгіёне гэта Бешанковіцкі, Глыбоцкі, Гарадоцкі, Мёрскі, Пастаўскі, Сенненскі, Талачынскі і Шаркоўшчынскі раёны. Паблізу Мінска гаворка аб такіх раёнах, як Бярэзінскі, Вілейскі, Капыльскі, Крупскі, Лагойскі, Маладзечанскі, Мядзельскі, Пухавіцкі, Слуцкі раёны.
Нагадаем, тэрыторыі з напружанай сітуацыяй на рынку працы вызначаюцца для патрэб дэкрэта №3 "Аб садзейнічанні занятасці": улічваюць такія паказчыкі, як узровень зарэгістраванага беспрацоўя, доля беспрацоўных, якія шукаюць працу больш за год, каэфіцыент напружанасці на рынку працы, тэмпы росту колькасці занятых і не толькі.
