МІНСК, 6 лют - Sputnik. Беларусь мае намер умацоўваць супрацоўніцтва з Расіяй, але не будзе зацыклівацца на адным кірунку, заявіў журналістам у Сафіі міністр замежных спраў Беларусі Уладзімір Макей.
Макей знаходзіцца ў Балгарыі з першым у гісторыі двухбаковых адносін афіцыйным візітам. Паводле яго слоў, Беларусь мае намер рухацца ў тым напрамку, які будзе адпавядаць яе нацыянальным інтарэсам.
"Наша прынцыповая пазіцыя ў тым, што мы не можам і не павінны сябраваць з кімсьці ў шкоду каму-небудзь", - заявіў Макей.
Пры гэтым ён заўважыў, што ў Беларусі гістарычна склаліся добрыя адносіны з "вялікім усходнім суседам" - Расіяй.
"Мы маем намер і далей умацоўваць ўсебаковае супрацоўніцтва з Расіяй. Але гэта не значыць, што мы павінны зацыклівацца толькі на адным кірунку", - цытуе кіраўніка МЗС БелТА.
Макей заўважыў, што залежнасць толькі ад аднаго кірунку пагібельная для такіх краін, як Беларусь, асабліва ў перыяд сусветных эканамічных і фінансавых крызісаў.
"Мы лічым, што для таго, каб выжыць, неабходныя збалансаваныя адносіны з усімі дзяржавамі. Зыходзячы з гэтага прынята стратэгічнае рашэнне па дыверсіфікацыі нашых гандлёва-эканамічных, палітычных, гуманітарных і іншых адносін", - сказаў кіраўнік беларускага МЗС.
У ходзе візіту беларускі міністр сустрэўся ў Сафіі з прэзідэнтам Балгарыі Руменам Радзевым, сваёй калегай міністрам замежных спраў Кацярынай Захарыевай, старшынёй Народнага сходу Цветай Караянчавай і прадстаўнікамі балгарскага бізнесу.
Падчас сустрэчы з балгарскім прэзідэнтам міністр перадаў Радзеву запрашэнне Аляксандра Лукашэнкі наведаць Беларусь.
