МІНСК, 10 лют - Sputnik. Беларусь і Літва могуць знайсці нешта агульнае ў ацэнках БелАЭС, заявіў у эфіры тэлеканала "Беларусь 1" кіраўнік літоўскага МЗС Лінас Лінкявічус.
БелАЭС застаецца адной з самых праблемных тэм у беларуска-літоўскіх адносінах: нягледзячы на заявы Мінска аб найвышэйшых стандартах бяспекі на станцыі, афіцыйны Вільнюс працягвае выступаць супраць станцыі і сёння ініцыюе адмову балтыйскіх краін ад закупкі энергіі з АЭС.
"Мы можам, напэўна, знайсці нейкі падыход з нагоды бяспекі", - заявіў Лінкявічус.
Як адзначыў кіраўнік МЗС Літвы, Вільнюс настойвае на кантакце з міжнароднымі арганізацыямі, каб яны былі б уключаны ў план дзеянняў, каб былі выкананыя рэкамендацыі.
Пры гэтым Лінкявічус дадаў, што ён убачыў у беларускага боку гатоўнасць запрасіць на станцыю еўрапейскіх спецыялістаў, у тым ліку з Еўракамісіі.
"Нягледзячы на рознасць ацэнкі гэтага аб'екта, я адчуў, што нешта агульнае можам знайсці. Гэтая болька, на жаль, ёсць, ці ледзь не адзіная ў нашых адносінах", - дадаў Лінкявічус і пры гэтым адзначыў, што паміж краінамі ёсць шмат станоўчых прыкладаў супрацоўніцтва.
У пачатку мінулага тыдня Лінкявічус знаходзіўся ў Беларусі з двухдзённым візітам. Апрача сустрэчы з прадстаўнікамі літоўскай дыяспары, удзельнічаў ён і ў мерапрыемствах з кіраўніком МЗС Беларусі Уладзімірам Макеем.
