МІНСК, 8 сак - Sputnik. Беларусь мае магчымасці для таго, каб абараніцца ад распаўсюджвання каронавіруснай інфекцыі, заявіў у эфіры тэлеканала АНТ міністр аховы здароўя рэспублікі Уладзімір Каранік.
Першы выпадак каронавіруса быў зафіксаваны ў Беларусі ў канцы лютага. На сёння ў рэспубліцы пацверджаны каронавірус у шасці чалавек: двух - у Віцебску, чатырох - у Мінску. Пры гэтым аналізы "нулявога пацыента", студэнта БНТУ з Ірана, ужо адмоўныя - гэта значыць, ён здаровы.
Рызыкі мінімальныя
Кіраўнік беларускага Міністэрства аховы здароўя падкрэслівае: краіна мае магчымасці для таго, каб абараніцца ад распаўсюджвання каронавіруса і з'яўлення цяжкіх формаў інфекцыі.
"Каб ніхто ад гэтай хваробы не памёр, у нашых сілах распачаць усе меры. Мы на сённяшні момант рызыку менавіта цяжкіх формаў расцэньваем як не вельмі высокую, таму што ў адрозненне ад многіх краін у нас ёсць некалькі іншая пабудова сістэмы, якая дазваляе больш аператыўна і адэкватна рэагаваць на наяўныя выклікі", - адзначыў кіраўнік Міністэрства аховы здароўя.
Нагадаем, адразу пасля пачатку распаўсюджвання каронавіруса ў свеце беларускія медыкі ўзмацнілі супрацьэпідэмічныя меры. Таксама ўзмоцнены і меры прафілактыкі - для недапушчэння росту колькасці хворых.
Перавага супраць каронавіруса
На думку міністра, у Беларусі ў параўнанні з сумежнымі краінамі ў барацьбе з каронавірусом ёсць шэраг пераваг. Сярод іх - існаванне санэпідслужбы.
Няма ў большасці краін і такога паняцця, як інфекцыйныя бальніцы: пацыенты з лёгкімі праявамі знаходзяцца дома, з сур'ёзнымі - у звычайных бальніцах. Каранік упэўнены: гэта тоіць у сабе велізарную небяспеку, бо заразіцца могуць і здаровыя.
Менавіта таму, па словах міністра, у Беларусі і вырашылі падзяляць патокі пацыентаў. Як прыклад аператыўнага рэагавання Каранік прывёў першы выпадак каронавіруса.
"На працягу сутак быў шпіталізаваны 91 кантакт першага ўзроўню. Аналіз ў гэтых выпадках можа прыйсці днём, раніцай ці ноччу. Мы на гэта рэагуем адразу ж. У першым выпадку з каронавірусам нарада была сабрана ў Міністэрстве аховы здароўя ў 3 гадзіны ночы. Адпаведна, мы павінны мець рэзервовы фонд ложкаў для таго, каб не дапусціць перасячэння патокаў пацыентаў з падазрэннем на інфекцыю і з іншымі захворваннямі. Таму і ствараюцца меры прафілактыкі. Чым лепш мы будзем гатовыя прафілактычна, тым менш выпадкаў, што гэтыя койкі нам усім спатрэбяцца. На сённяшні момант яны нам не патрэбныя", - падкрэсліў Каранік.
На сёння ў свеце пацверджаныя больш за 106 тысяч выпадкаў каронавіруснай інфекцыі. Больш за 80 тысяч выпадкаў прыпадаюць на Кітай, больш за сем тысяч - на Паўднёвую Карэю, больш за пяць тысяч выпадкаў - на Італію і столькі ж на Іран.
