МІНСК, 23 сак - Sputnik. Міністэрства аховы здароўя Беларусі рэкамендуе ўсім, хто прыязджае ў рэспубліку, самаізалявацца для прафілактыкі распаўсюджвання COVID-19. Пра гэта намеснік начальніка аддзела гігіены, эпідэміялогіі і прафілактыкі ведамства Іна Карабан паведаміла журналістам у панядзелак.
"Усім, хто прыязджае, рэкамендуем самаізаляцыю", - сказала Іна Карабан і дадала, што ў пунктах пропуску на мяжы такім людзям выдаюць адпаведныя памяткі.
Акрамя таго, медыкі рэкамендуюць і такую меру, як сацыяльнае дыстанцыяванне. У такім выпадку гаворкі пра забарону на наведванне вуліц або паркаў не ідзе, аднак падчас прагулак трэба выконваць з іншымі людзьмі дыстанцыю ў метр ці паўтара.
Прадстаўнікі профільнага ведамства нагадалі: за лячэнне грамадзян адказная сістэма аховы здароўя рэспублікі, аднак беларусы самі нясуць адказнасць за прынятае рашэнне аб выездзе на адпачынак за мяжу.
На сёння ў Беларусі праведзена больш за 21 тысячу тэстаў на COVID-19, тэсціраванне праводзіцца з 23 студзеня. Паводле апошніх звестак, у Беларусі ўжо выпісаныя або рыхтуюцца да выпіскі 22 пацыенты, у якіх раней тэст на каронавірус даў станоўчы вынік; пасля праведзенага лячэння тэсты адмоўныя. Яшчэ 59 чалавек знаходзяцца пад медыцынскім кантролем і на лячэнні.
