МІНСК, 4 мая - Sputnik. Прэзідэнцкія выбары пройдуць у Беларусі гэтым летам, крайні тэрмін - канец жніўня, заявіў сёння падчас анлайн-перамоваў з прэзідэнтам Малдовы Ігарам Дадонам беларускі лідар Аляксандр Лукашэнка.
Падчас анлайн-сустрэчы з прэзідэнтам Малдовы беларускі лідар падкрэсліў, што той у Беларусі - заўсёды жаданы госць, "як толькі вам дазволяць абставіны".
Лукашэнка адзначыў, што хутка ў Малдове прэзідэнцкія выбары, аднак у Беларусі яны будуць яшчэ раней.
"У нас няма падстаў тут іх пераносіць, няма магчымасці па Канстытуцыі перанесці гэтыя выбары. Таму мы правядзем выбары, у бліжэйшы час з датай вызначымся. Гэта будзе дакладна летам. Апошні тэрмін - канец жніўня", - заявіў Лукашэнка, яго словы прывяла БелТА.
Кажучы аб выбарах у Малдове, Лукашэнка выказаў упэўненасць, што Дадон атрымлівае ўсё большую падтрымку народа.
Лукашэнка запэўніў, што Беларусь гатовая, як і раней, актыўна развіваць супрацоўніцтва з Малдовай: "Ведайце, што мы заўсёды побач, заўсёды гатовыя падтрымліваць ваш народ. Мы многае для Малдовы можам зрабіць. Як толькі будуць знятыя ў вас абмежаванні, мы гатовыя ехаць да вас, ляцець, гандляваць, мець зносіны. Будзем рады бачыць і прадстаўнікоў Малдовы ў нас у Беларусі", - паабяцаў прэзідэнт.
