Гаспадар кафэ Аляксандр Аўдзевіч - інвалід-вазочнік з беларускага горада Ліда дзевяць гадоў таму трапіў у ДТЗ на спартыўным матацыкле - траўма прывязала мужчыну да інваліднага крэсла. Нягледзячы на тое, што здарылася, ён працягнуў весці актыўны лад жыцця: скакаць з парашутам, падарожнічаць на хендбайке, выступаць ініцыятарам шматлікіх інклюзіўных праектаў.
Так, па ініцыятыве Аўдзевіча, каманда прафесіяналаў на працягу двух гадоў навучала прафесіі барыста людзей з абмежаваннямі ў розных гарадах Беларусі. Аднак праект не скончыўся поспехам з-за негатовасці мясцовых кавярняў прымаць на працу людзей з інваліднасцю. І тады Андрэй вырашыў самастойна адкрыць "асаблівае" кафэ.
"Канцэпцыя звязана з тым, што гэтая прафесія даступная і запатрабаваная, і, у прынцыпе, на гэтым рынку людзі з інваліднасцю могуць добра канкураваць са звычайнымі людзьмі і зарабляць грошы", - дзеліцца Аляксандр.
Невялікае памяшканне цалкам абсталявана такім чынам, каб людзі з абмежаваннямі ў перамяшчэнні маглі свабодна зайсці або заехаць у кафэ на вазку. Ва ўстанове працуюць двое чалавек - дзяўчына на вазку Наталля Астаніна і малады чалавек Васіль з сіндромам Даўна, які выконвае абавязкі дырэктара ўстановы.
Аляксандр лічыць, што стаўленне кліентаў да "асаблівых" работнікаў кавярні станоўчае.
"Ніякіх праблем, звязаных з неразуменнем, ці нейкіх праблем, звязаных з інваліднасцю людзей, работнікаў кавярні, абсалютна няма, ўсё пазітыўна, паважна. Мне здаецца, што ўсе задаволеныя, усім цікава", - распавядае гаспадар кафэ.
Спецыяльна для кавярні былі замоўленыя эксклюзіўныя кубачкі з напісанымі шрыфтам Брайля добрымі словамі, каб падняць настрой наведвальнікам з абмежаваннямі па зроку.
Кліентам з інваліднасцю ў кавярні даюць зніжку ў 50% на любую замову. Для навучання дзеючых і патэнцыйных супрацоўнікаў установы побач з кафэ знаходзіцца трэнінгавы цэнтр.
