МІНСК, 17 чэр - Sputnik. Каронавірус унесены ў пералік захворванняў, якія даюць права на бясплатнае забеспячэнне лекавымі сродкамі, а таксама лячэбным харчаваннем. Адпаведны дакумент апублікаваны на Нацыянальным прававым інтэрнэт-партале ў сераду.
Новаўвядзенні замацаваны ў пастанове Савета міністраў Беларусі №344 ад 15 чэрвеня 2020 года.
"Пералік захворванняў, якія даюць права грамадзянам на бясплатнае забеспячэнне лекавымі сродкамі, якія выдаюцца па рэцэптах урачоў у межах пераліку асноўных лекавых сродкаў, пры амбулаторным лячэнні, а таксама лячэбным харчаваннем (...) дапоўніць пазіцыяй "Інфекцыя, выкліканая каронавірусам COVID-19", - сказана ў дакуменце.
У згаданы спіс у цяперашні час ўключана каля сотні захворванняў (у іх ліку сухоты, цукровы дыябет, хвароба Паркінсана, ДЦП, рассеяны склероз, эпілепсія і іншыя).
Пастанова ўступае ў сілу пасля яе афіцыйнага апублікавання.
Што выкарыстоўваюць пры лячэнні
Медыцынская дапамога пацыентам з COVID-19 у Беларусі аказваецца паводле рэкамендацый СААЗ.
У лячэнні выкарыстоўваюцца розныя прэпараты: у іх ліку супрацьвірусны асельтамівір (беларускі прэпарат "Флустоп" адсутнічае ў продажы большасці аптэк некалькі месяцаў, ёсць дарагі замежны аналаг "Таміфлю", які каштуе каля 60 рублёў за ўпакоўку), супрацьмалярыйны гідроксіхларахінн ("Іммард" у Беларусі прадаюць ад 15 рублёў), антыбактэрыйныя лекі азітраміцын (ад 1,5 рубля).
З нядаўняга часу ўжываецца таксама антывірусны японскі прэпарат "Авіган". Пацыентам са сярэднецяжкай формай інфекцыі COVID-19 рэкамендаваны Фавіпіравір, у асобных выпадках глюкакартыкоіды (метылпрэднізалон, дэксаметазон). Дадзеныя схемы выкарыстоўваюцца пры лячэнні ў стацыянары.
Урачы перасцерагаюць ад самалячэння: усе згаданыя прэпараты павінны прымяняцца строга па прызначэнні і пад наглядам спецыяліста.
