МІНСК, 22 чэр - Sputnik. Стаўка рэфінансавання зніжаецца з 1 ліпеня да 7,75%, адпаведнае рашэнне сёння прыняло праўленне Нацыянальнага банка.
Папярэдні раз Нацыянальны банк зніжаў стаўку рэфінансавання ў маі. Тады меркавалася, што наступны раз праўленне рэгулятара правядзе паседжанне па грашова-крэдытнай палітыцы толькі ў жніўні.
Сёння ў Нацбанку прайшло дадатковае пасяджэнне па гэтым пытанні.
Згодна з рашэннем рэгулятара, з 1 ліпеня стаўку рэфінансавання знізяць з 8% да 7,75%. Стаўка па крэдыце овернайт зніжаецца да 8,75%, па дэпазіце овернайт - да 6,75%.
"Інфляцыя запавольваецца хутчэй, чым чакалася. У маі 2020 года прырост спажывецкіх цэн у гадавым вымярэньні склаў 4,9% пры 5,4% у красавіку 2020 года. Гадавая базавая інфляцыя запаволілася да 3,9% (4,5% у красавіку 2020 года)", - растлумачылі ў Нацбанку.
Як дадалі ў рэгулятары, "стрымліваючы ўплыў дэзінфляцыйных фактараў праяўляецца мацней, чым прагназавалася".
"Больш хуткімі тэмпамі запавольваюцца інфляцыйныя працэсы ў краінах - гандлёвых партнёрах Беларусі. На гэтым фоне замежныя цэнтральныя банкі актыўна зніжаюць свае ключавыя стаўкі", - дадалі ў Нацбанку.
Нацыянальны банк таксама працягвае змякчэнне крэдытна-грашовай палітыкі. Мяркуецца, што гэта дазволіць захаваць "прымальны ўзровень цэнавай і фінансавай стабільнасці".
Характэрна, што крэдытна-грашовая палітыка была сярод тэм нарады ў прэзідэнта на мінулым тыдні, на якім абмяркоўвалася работа банкаўскай сферы. На нарадзе Аляксандр Лукашэнка даў даручэнне знізіць стаўку рэфінансавання да канца чэрвеня.
Стаўка рэфінансавання - гэта працэнт, пад які Нацбанк выдае крэдыты камерцыйным банкам. Зніжэнне гэтага паказчыка кажа аб павелічэнні прыбытковасці саміх банкаў і пра тое, што яны могуць прадастаўляць больш даступныя крэдыты насельніцтву.
