МІНСК, 14 ліп - Sputnik. Прэзідэнт Расіі Уладзімір Пуцін падпісаў закон, які спрашчае атрыманне расійскага грамадзянства, адпаведны дакумент размешчаны на афіцыйным партале прававой інфармацыі РФ.
Так, працэдура атрымання расійскага пашпарта спрашчаецца для тых, у каго было грамадзянства СССР.
"Асобы без грамадзянства, якія дасягнулі ўзросту васемнаццацi гадоў i валодаюць дзеяздольнасцю, маюць права звярнуцца з заявамі аб прыёме ў грамадзянства РФ у спрошчаным парадку (...), калі названыя асобы мелі грамадзянства СССР, пражывалі і пражываюць у дзяржавах, якія ўваходзілі ў склад СССР, і не атрымалі грамадзянства гэтых дзяржаў", - сказана ў законе.
Замежнікі і асобы без грамадзянства, якія пастаянна жывуць на тэрыторыі Расіі, таксама могуць разлічваць на спрошчанае атрыманне грамадзянства ў шэрагу выпадкаў: калі больш за тры гады знаходзяцца ў шлюбе з грамадзянінам РФ, маюць агульных дзяцей у шлюбе або аднаго з бацькоў з расійскім грамадзянствам.
Акрамя таго, адзначаецца ў тэксце дакумента, працэдура спрошчана для грамадзян Беларусі, Казахстана, Украіны і Малдовы. Вядома таксама, што цяпер для іншаземцаў і асоб без грамадзянства, якія прэтэндуюць на атрыманне расійскага пашпарта, будзе ўведзена абавязковая дактыласкапічная рэгістрацыя.
Закон уступае ў сілу па заканчэнні тэрміна ў тры месяцы пасля дня яго афіцыйнага апублікавання.
