ВІЦЕБСК, 17 ліп - Sputnik. Прэзідэнт Беларусі Аляксандр Лукашэнка напярэдадні прыняў удзел у цырымоніі адкрыцця ХХIX Міжнароднага фестывалю мастацтваў "Славянскі базар у Віцебску", перадае Sputnik.
"У гэты ўрачысты вечар мяне перапаўняюць пачуцці радасці і гонару за ўсіх нас, перш за ўсё, за беларусаў, якія ніколі не станавіліся і не ўстаюць на калені перад выклікамі часу. Прыклад таму - "Славянскі базар", фестываль з ярким і цікавым лёсам", - сказаў Лукашэнка.
Ён таксама адзначыў, што "Славянскі базар" стаў сэрцам культурнага адзінства, якое закладзена ў галоўную ідэю фестывалю.
"Сёння, калі ўсе краіны знаходзяцца на мяжы глабальнага геапалітычнага крызісу, перадзелу свету, для нас жыццёва важна захаваць традыцыю, якая аб'ядноўвае людзей", - цытуе Лукашэнку яго прэс-служба.
Паводле яго слоў, "Славянскі базар", нягледзячы на тое, што адбываецца ў свеце, толькі ўмацоўваў дружбу народаў.
Лукашэнка падкрэсліў, што беларусы - мірныя людзі, якія робяць усё "прыгожа і па-мірнаму", таму кожны год "Славянскі базар" прыцягвае гасцей і ўдзельнікаў з розных частак планеты.
"Чвэрць стагоддзя таму гэта вялікае дзейства магло адправіцца ў падарожжа па гарадах і вёсках Савецкага Саюза. А ў гэтым годзе ён мог проста стаць на паўзу, як гэта здарылася з вядомымі сусветнымі шоу і конкурсамі. Але тады і сёння мы збераглі наш "Славянскі базар", нашу славянскую традыцыю", - сказаў прэзідэнт.
Ён падкрэсліў, што, нягледзячы на зачыненыя межы, у Віцебску зараз сабраліся самыя яркія і тытулаваныя артысты брацкіх Расіі і Украіны, а таксама іншых дзяржаў.
Узнагароды
Прэзідэнт падчас цырымоніі адкрыцця фестывалю ўручыў прэміі Саюзнай дзяржавы ў галіне літаратуры і мастацтва: іх атрымалі рэжысёр студыі "Летапіс" Анатоль Алай, мастацкі кіраўнік тэатра-студыі кінаакцёра студыі "Беларусьфільм" Аляксандр Яфрэмаў, а таксама аўтарскі калектыў - рэжысёры Ірына Марголіна, Аксана Чаркасава, Алена Пяткевіч і Ірына Кадзюкова.
Акрамя таго, спецыяльную ўзнагароду прэзідэнта "Праз мастацтва - да міру і ўзаемаразумення" атрымаў народны артыст РФ Філіп Кіркораў.
Раней у чацвер у Віцебску была адкрыта імянная пліта Кіркорава на Плошчы зорак. Падчас цырымоніі выканаўца заявіў, што не меў права адмовіцца ад запрашэння на "Славянскі базар".
"Люблю фэсты, асабліва "Славянскі базар", ён стаў неад'емнай часткай майго жыцця. Форум у гэты час выжыў. У той час як іншыя здаліся, вы змаглі правесці XXIX фестываль", - падкрэсліў артыст.
