МІНСК, 7 вер - Sputnik. Беларусі неабходны інклюзіўны нацыянальны дыялог, пра гэта заявіў вярхоўны прадстаўнік ЕС па знешняй палітыцы і палітыцы бяспекі Жозеп Барэль.
"У чарговы раз уражлівыя масавыя акцыі пратэсту ў Мінску і іншых гарадах дэманструюць рашучасць беларускага народа дамагчыся сваіх свабод, правоў і дэмакратыі. І ўсё гэта нягледзячы на арышты, запалохванне і гвалт з боку ўладаў Беларусі. Неабходны інклюзіўны нацыянальны дыялог", - напісаў кіраўнік дыпламатыі ЕС у сваім Twitter.
Нагадаем, што ў нядзелю, нягледзячы на дрэннае надвор'е, па ўсёй Беларусі прайшлі чарговыя маштабныя несанкцыянаваныя акцыі пратэсту. У Мінску акцыя павінна была пачацца на плошчы Незалежнасці, аднак праваахоўнікі перакрылі праспект Незалежнасці і вымусілі ўдзельнікаў шэсця змяніць маршрут. Міліцыя несла службу ва ўзмоцненым рэжыме, некаторыя знакавыя аб'екты ў сталіцы ачапілі калючым дротам і выставілі ўздоўж яго вайскоўцаў. У выніку некаторых пратэстуючых затрымалі. Дакладную колькасць затрыманых назавуць у МУС у панядзелак.
Прэзідэнцкія выбары ў Беларусі адбыліся 9 жніўня. Па дадзеных ЦВК, перамогу атрымаў дзеючы прэзідэнт Аляксандр Лукашэнка, які набраў 80,1% галасоў. Пасля выбараў у Беларусі пачаліся масавыя акцыі пратэсту нязгодных з афіцыйнымі вынікамі галасавання. Апазіцыя і яе прыхільнікі сцвярджаюць, што вынікі сфальсіфікаваныя, а перамогу на выбарах атрымала Святлана Ціханоўская.
Шэраг краін не прызналі вынікі выбараў у Беларусі. Аб увядзеннi санкцый заяўляў Еўрасаюз, а Літва, Латвія і Эстонія забаранілі ўезд на сваю тэрыторыю 30 беларускіх грамадзян.
