МІНСК, 11 вер - Sputnik. Прэм'ер-міністры Венгрыі і Славакіі палічылі "не самай лепшай ідэяй" сустрэчу з прадстаўнікамі беларускай апазіцыі ў Любліне, пра гэта заявіў кіраўнік урада Чэхіі Андрэй Бабіш.
Раней Бабіш выступіў супраць афіцыйнай сустрэчы прэм'ер-міністраў краін Вышаградскай групы з прадстаўнікамі беларускай апазіцыі, адзначыўшы, што гэта "паспешны крок", які не адпавядае агульнаеўрапейскай пазіцыі. Экс-кандыдат у прэзідэнты Беларусі Святлана Ціханоўская пазней заявіла, што не паедзе на гэтую сустрэчу.
"Учора я сказаў, што гэта (сустрэча з лідэрамі беларускай апазіцыі - Sputnik) - не самая лепшая ідэя. Пра гэта я гаварыў учора ўвечары таксама з венгерскім і славацкім прэм'ерамі Віктарам Орбанам і Ігарам Матовічам. Яны прытрымліваюцца падобнага меркавання. Беларусь абвінавачвае нас у гібрыднай вайне, у тым, што мы ўмешваемся ў яе ўнутраныя справы. Я перакананы, што вынікам такой сустрэчы (з апазіцыяй - Sputnik) была б вада на млын дыктатара (прэзідэнта Беларусі Аляксандра - Sputnik) Лукашэнка, які зноў паказваў бы на нас", - сказаў Бабіш журналістам у пятніцу.
Ён нагадаў, што раней правёў сустрэчу з прадстаўнікамі беларускай дыяспары ў Чэхіі, а кіраўнік МЗС краіны Томаш Петрычак напярэдадні сустрэўся з членам Каардынацыйнага савета апазіцыі Паўлам Латушкам.
"Тая сустрэча, якая была прапанаваная (польскім бокам - Sputnik) у Любліне, не адпавядае нашым дамоўленасцям падчас Еўрапейскага савета (аб сумесных дзеяннях краін ЕС у адносінах да Беларусі - Sputnik)", - падкрэсліў Бабіш.
Масавыя пратэстныя акцыі апазіцыі пачаліся па ўсёй Беларусі 9 жніўня пасля выбараў прэзідэнта. Па дадзеных ЦВК, на іх у шосты раз перамог Аляксандр Лукашэнка, які набраў 80,1% галасоў. Апазіцыя лічыць, што большасць беларусаў прагаласавала за Святлану Ціханоўскую, а афіцыйныя вынікі былі сфальсіфікаваныя.
У першыя дні пратэстныя акцыі душыліся сілавікамі. У дачыненні да пратэстуючых, не згодных з вынікамі выбараў, ужывалі слезацечны газ, вадамёты, светлашумавыя гранаты і гумовыя кулі. Затым праваахоўныя органы спынілі ўжываць сілавыя метады.
