МІНСК, 21 вер - Sputnik. Польшча, Літва і Румынія прапануюць Еўрапейскаму саюзу даць Беларусі бязвізавы рэжым, доступ да фінансавых інстытутаў і дапамогу ў далучэнні да СГА. Пра гэта сказана ў сумеснай заяве прэзідэнтаў трох краін, распаўсюджанай у панядзелак.
"Мы лічым, што, падтрымліваючы народ Беларусі, Еўрапейскі саюз - як буйная сусветная эканамічная дзяржава - павінен падаць пакет дапамогі для дэмакратычных эканамічных пераўтварэнняў", - сказана ў заяве.
Аўтары лічаць, што пакет павінен уключаць, у тым ліку: "садзейнічанне гандлю з ЕС і дапамогу ў перамовах аб уступленні ў СГА; бязвізавы рэжым пры наяўнасці неабходных умоў; садзейнічанне дыверсіфікацыі энергетычнага сектара і энергетычнай бяспекі Беларусі".
Акрамя таго, у заяве прапанавана ўключыць у пакет дапамогі "доступ да фінансавых рэсурсаў для рэструктурызацыі і запуску ліберальнай эканомікі Беларусі, павелічэнне прысутнасці і актыўнасці міжнародных фінансавых інстытутаў у рэфармаванні эканомікі і павелічэнні інвестыцый".
Кіраўнікі Польшчы, Літвы і Румыніі заяўляюць таксама, што будуць паважаць любое рашэнне беларускага народа, прынятае законным шляхам: на іх думку, "ніхто акрамя народа не мае канчатковага правы вырашаць лёс краіны".
"Мы заклікаем міжнародную супольнасць далучыцца да Еўрапейскага саюза і яго дзяржаў-членаў у падрыхтоўцы пазітыўнага парадку дня для Беларусі разам з пакетам падтрымкі палітычных, эканамічных і сацыяльных пераўтварэнняў у краіне", - адзначаецца ў заяве.
Раней польскі прэм'ер Матэуш Маравецкі заявіў аб тым, што краіны Вышаградскай групы гатовыя ўвесці для грамадзян Беларусі бязвізавы рэжым: гаворка пра Польшчу, Чэхію, Славакію і Венгрыю. Чацвёрка мела намер падаць дадзены пакет на бліжэйшым пасяджэнні Еўрасавета.
З 17 верасня грамадзяне Беларусі могуць трапіць у Польшчу на падставе візы, выдадзенай у турыстычных мэтах. А да гэтага краіна ўжо прыняла некалькіх беларусаў наогул без якіх-небудзь візаў у сувязі "са складанай палітычнай сітуацыяй" у нашай краіне.
