МІНСК, 12 кас - Sputnik. Бізнесмену і палітолагу Юрыю Васкрасенскаму і дырэктару мінскага офіса IT-кампаніі PandaDoc Дзмітрыю Рабцэвічу змененая мера стрымання - яны выйшлі з СІЗА КДБ, паведамілі ў нядзелю ў эфіры тэлеканала "Беларусь 1".
У суботу 10 кастрычніка Аляксандр Лукашэнка наведаў ізалятар, дзе знаходзяцца экс-банкір Віктар Бабарыка і іншыя фігуранты крымінальных спраў, якія былі ўзбуджаныя ў перадвыбарчы перыяд і пасля прэзідэнцкай кампаніі. На сустрэчы прысутнічалі сам экс-банкір, яго сын Эдуард, юрыст Лілія Уласава, прадпрымальнік Васкрасенскі, палітолаг Віталь Шкляр і іншыя асобы.
"Як стала вядома, дырэктару кампаніі PandaDoc Дзмітрыю Рабцэвічу і Юрыю Васкрасенскаму сёння была змененая мера стрымання", - сказалі ў эфіры канала.
Там таксама паведамілі, што абодва затрыманыя ў нядзелю 11 кастрычніка выйшлі на волю.
Хто гэтыя людзі
Васкрасенскі - бізнесмен, дырэктар адной з кампаній-рэзідэнтаў Парку высокіх тэхналогій. Падчас выбарчай кампаніі з'яўляўся сябрам ініцыятыўнай групы Бабарыка. Ён быў затрыманы 12 жніўня па абвінавачванні ў арганізацыі масавых беспарадкаў (ч. 2 арт. 293 Крымінальнага кодэкса Беларусі).
Рабцэвіча затрымалі на пачатку верасня: у дачыненні да яго (як і некалькіх топ-менеджараў PandaDoc, кампаніі, што заявіла аб аказанні фінансавай падтрымкі сілавікам, якія звольняцца з органаў) распачалі справу на падставе ч. 4 арт. 210 КК - крадзеж шляхам злоўжывання службовымі паўнамоцтвамі ў асабліва буйным памеры.
