МІНСК, 17 ліс - Sputnik. Частка беларускіх студэнтаў, якія навучаюцца ў Расіі, можа быць забяспечана стыпендыяй, сказаў кіраўнік Рассупрацоўніцтва Яўген Прымакоў, перадае карэспандэнт Sputnik.
Як адзначыў Прымакоў, звыклыя правілы паступлення беларускіх абітурыентаў у расійскія вышэйшыя навучальныя ўстановы пакуль не мяняюцца. Але гэтае пытанне ўжо абмяркоўваецца сумесна з Міністэрствам адукацыі і навукі РФ. Расійскі бок зацікаўлены, каб тут вучылася больш беларускіх студэнтаў.
"У беларусаў ёсць свой АДЭ (Цэнтралізаванае тэсціраванне - Sputnik), свой атэстацыйны экзамен, які не зусім ідэнтычны нашаму. Гэта, вядома, трэба ўніфікаваць, і гэты экзамен прызнаваць у нас, каб беларускія рабяты маглі (у нас жа Саюзная дзяржава) на тых жа правах паступаць у расійскія ВНУ", - лічыць кіраўнік Рассупрацоўніцтва.
Дапамога - гэта не "квіток у Расію"
Яўген Прымакоў звяртае ўвагу на вялікую колькасць стыпендый на адукацыю для беларусаў, якія раздае Польшча.
"У разы больш, чым Расія. Квоты, якія выдаюцца на паступленне беларусаў у расійскія ВНУ, не вельмі ўпэўнена сябе адчуваюць: яны трошкі памяншаюцца, крыху менш становіцца людзей, якія падаюць дакументы на паступленне", - адзначыў ён.
Пры гэтым кіраўнік Рассупрацоўніцтва выказаў меркаванне, што гэта сістэмная праблема і не датычыцца выключна Беларусі. Замежнікам звычайна даецца права вучыцца ў расійскім ВНУ, але гэта не квіток у Расію і не дапамога ў атрыманні стыпендыі або здыме кватэры. Не так даўно Дзярждума РФ прыняла закон, які даў права на працу замежным студэнтам.
"Гэта невялікі ўдар па ўнутраным рынку працы - 15 тысяч чалавек, што прыязджаюць на вучобу. Што амерыканцы, што еўрапейцы даюць у асноўным стыпендыі і гранты. Мы проста квоту. Я лічу, што нейкая частка з гэтай квоты павінна забяспечвацца мінімальнай стыпендыяй, тады гэта будзе карысна. Гэта не трата бюджэтных грошай, гэта не дабрачыннасць. Гэта рэч, якая потым на далёкай дыстанцыі абавязкова акупіцца", - падкрэсліў Прымакоў.
На яго думку, людзі, якія сталі інжынерамі і дактарамі па расійскіх адукацыйных стандартах, і далей з большай гатоўнасцю і разуменнем будуць працаваць у сябе ў краіне.
"У дачыненні да Беларусі вельмі важна - гэта ўніфікацыя атэстацыі. Так, каб яны (беларускія абітурыенты -Sputnik) маглі да нас паступаць як у сябе дома", - падсумаваў Яўген Прымакоў.
І дадаў: важна, каб усё гэта не разбурыў каронавірус. У Расіі чакаюць беларускіх студэнтаў пасля таго, як гэта ўсё скончыцца.
