Японскі мастак Кендзі Хасімота - майстар вельмі тонкага мастацтва. Ён выразае цэлыя сюжэты на апалым лісце.
На незвычайнае хобі яго натхніў іспанскі мастак Ларэнца Дзюран. Сам жа японец перш працаваў звычайным офісным служачым. У адной кампаніі ён прапрацаваў каля дзевяці гадоў. А пасля звальнення захацеў заняцца тым, што атрымліваецца ў яго сапраўды добра.
"Я хацеў займацца тым, што ў мяне добра атрымліваецца, і калі я пачаў шукаць тое, што мне падыдзе, я падумаў, што займуся мастацтвам", - распавядае лісцяных спраў майстар.
Перш мастак працаваў у падобнай тэхніцы з паперай. Але даць рады апаламу лісцю аказалася больш складана.
"Калі справа дайшла да выкарыстання лісця, якое расце выключна ў прыродзе, я ўбачыў, што ліст станавіўся сухім у тым месцы, дзе я яго разрэзаў. У рэшце рэшт паверхня атрымлівалася няроўная", - распавядае Хасімота.
Адлюстраваць на лісце маштабны сюжэт няпроста. І мастак спадзяецца, што ў яго творах кожны можа ўбачыць зачэпку, якая дазволіць фантазіраваць далей.
"Людзі, якія глядзяць на яго, думаюць: "Што будзе пасля гэтага?" Я хачу, каб яны атрымлівалі асалоду ад таго, што прадстаўляюць розныя сюжэты, як намаляваны свет выходзіць за межы ліста", - кажа Хасімота.
А вось у пошуку крыніц натхнення абмежаванняў няма - анімэ, гульні, коміксы або звычайная прагулка ў парку. А што з гэтага выходзіць, глядзіце на відэа.
