Не абавязкова адпраўляцца далёка за горад, каб наведаць галоўнага навагодняга персанажа. З 23 снежня домік Дзеда Мароза адкрыўся ў парку Горкага.
У дзень адкрыцця выпаў снег, і любімы дзіцячы парк стаў падобны на сапраўдны казачны лес. Першых наведвальнікаў з усмешкай сустрэла Снягурка, а Дзед Мароз з'явіўся з лесу з маленькай ялінкай. Разам з любімымі героямі дзеці ўпрыгожылі яе цацкамі, а потым вадзілі карагод, гулялі ў пацешныя гульні і атрымлівалі падарункі за расказаныя вершы.
А яшчэ тут можна пакідаць для дзядулі лісты ў адмысловай паштовай скрыні.
Ахвотнікаў наведаць домік у свята заўсёды нямала, так што калі пажадаеце пабываць тут, давядзецца купіць білет. Кошт з мінулага года не змяніўся: у святочныя дні – 25 рублёў з сям'і з адным дзіцем, у буднія – 22. Чакаюць не толькі сем'ямі, але і групамі. Цана для групы залежыць ад колькасці дзяцей. Дзверы доміка будуць адкрыты штодня з 10:30 да 18:30, за выключэннем 1 студзеня – у першы дзень Новага года Дзед Мароз пачне прымаць гасцей пасля поўдня.
Спяшаецеся, бо ўжо 7 студзеня ў 15:00 дзядуля і ўнучка з'едуць з парку.
