МІНСК, 13 лют – Sputnik. Кіраўнік Цэнтрвыбаркама Беларусі Лідзія Ярмошына назвала аптымальную дату для правядзення рэферэндуму па Канстытуцыі. Пра гэта старшыня ЦВК заявіла ў інтэрв'ю карэспандэнту Sputnik.
Прэзідэнт рэспублікі Аляксандр Лукашэнка, выступаючы на Усебеларускім народным сходзе, заявіў, што рэферэндум па ўнясенні змяненняў у Асноўны Закон краіны можа адбыцца ў тыя ж тэрміны, што і выбары ў мясцовыя Саветы дэпутатаў.
"Пра гэта ніхто не ведае. Але адразу ж магу сказаць, што прэзідэнт сказаў пра магчымасць сумяшчэння з мясцовымі выбарамі. Выбары павінны прайсці не пазней за 18 студзеня наступнага года. Такім чынам рэферэндум пройдзе ў гэтыя ж тэрміны. Хутчэй за ўсё, гэта канец гэтага года. Лепш гэта зрабіць у сярэдзіне снежня", - заявіла Ярмошына.
На яе думку, выбары і галасаванне на рэферэндуме вельмі проста сумясціць, таму што гэта два выбарчых бюлетэня.
"Гэта наадварот самы выгадны варыянт. У нас рэферэндум, як правіла, сумяшчаўся з выбарчай кампаніяй. Дастаткова ўспомніць рэферэндум 2004 года - гэта сумяшчэнне з парламенцкімі выбарамі. Рэферэндум 1996 года часткова сумяшчаўся з выбарамі ў мясцовыя органы ўлады", - нагадала Ярмошына.
Кіраўнік ЦВК звярнула ўвагу, калі рэферэндум праводзіцца асобна заўсёды ёсць праблемы з фінансаваннем. "Таму што грошы на рэферэндум ніколі не плануюцца. Гэта заўсёды такое спантаннае рашэнне. А вось грошы на выбары дэпутатаў ці прэзыдэнта ёсць заўсёды ў бюджэце. Таму рэферэндумы заўсёды імкнуцца сумясціць", - рэзюмавала яна.
На рэферэндум 1996-га выносіліся сем пытанняў, чатыры з якіх былі ініцыяваны прэзідэнтам, тры - парламентам. Адным з галоўных пытанняў было ўнясенне змяненняў і дапаўненняў у Канстытуцыю.
У 2004-м прайшоў ініцыяваны кіраўніком дзяржавы рэферэндум. На галасаванне выносілася адно пытанне: "Ці дазваляеце Вы першаму Прэзідэнту Рэспублікі Беларусь Лукашэнку А.Р. удзельнічаць у якасці кандыдата ў Прэзідэнты Рэспублікі Беларусь у выбарах Прэзідэнта і ці прымаеце частку першую артыкула 81 Канстытуцыі Рэспублікі Беларусь у наступнай рэдакцыі: "Прэзідэнт абіраецца на пяць гадоў непасрэдна народам Рэспублікі Беларусь на аснове ўсеагульнага, свабоднага, роўнага і прамога выбарчага права пры таемным галасаванні?"
Чытайце таксама:
- Лукашэнка: незнаёмаму прэзідэнту такую канстытуцыю аддаваць нельга
- Чупрыс: прэзідэнту паклалі на стол некалькі варыянтаў новай Канстытуцыі
- Праект новай Канстытуцыі будзе гатовы ў гэтым годзе, рэферэндум - у пачатку 2022-га
