МІНСК, 17 сак – Sputnik. Пасол Беларусі ў Расіі Уладзімір Сямашка ўпаўнаважаны весці перамовы па праекце пратакола аб унясенні праўкі ў пагадненне з Расіяй у газавай сферы, адпаведная пастанова Саўміна была апублікавана на нацыянальным прававым інтэрнэт-партале.
Сямашку дазволена пры неабходнасці ўносіць змяненні, якія "не маюць прынцыповага характару", і падпісваць дадзены пратакол пасля дасягнення дамоўленасці ў межах ухваленага праекта.
Сутнасць магчымых правак не ўдакладняецца.
Нагадаем, што ў лютым прэзідэнт Беларусі Аляксандр Лукашэнка падпісаў указ, які ўхваліў праект пратакола аб унясенні змяненняў у міжурадавае пагадненне з Расіяй у газавай сферы як аснову для правядзення перамоваў.
Пратакол павінен быў часова прымяняцца па заканчэнні дзесяці дзён з даты яго падпісання да ўступлення ў сілу.
Паміж ПАО "Газпром" і ААТ "Газпрам трансгаз Беларусь" да канца 2021 года дзейнічаюць кантракты на пастаўку газу ў рэспубліку і яго транспарціроўку праз тэрыторыю краіны. Раней Мінск і Масква дамовіліся аб цане на расійскі прыродны газ на 2021 год, яна складае 128,5 долара за тысячу кубаметраў. У 2020 годзе цана на газ для Мінска складала 127 долараў за тысячу кубаметраў.
Чытайце таксама:
- Сямашка і Мілер абмеркавалі супрацоўніцтва Беларусі і Расіі ў газавай сферы
- Аналітык распавёў, чаму цана на газ ў 2021 годзе для Беларусі камфортная
- Галоўчанка: краіны ЕАЭС паскораць працу над дамовай аб агульным рынку газу
