МІНСК, 22 сак – Sputnik. Дзве кампазіцыі - вясёлую і сумную - адправіла група "Галасы ЗМеста" на "Еўрабачанне", паведаміў лідэр бэнда Дзмітрый Бутакоў у эфіры СТБ.
На пытанне аб тым, як у групы ўзнікла ідэя заявіцца на міжнародны конкурс, Бутакоў адказаў, што заяўку падавалі проста так, "ад балды". А калі бэнду паведамілі, што "Галасы ЗМеста" паедуць на "Еўрабачанне", група вельмі здзівілася.
Бутаков упэўнены, што кампазіцыя "Я навучу цябе", заяўленая першапачаткова, - нейтральная, а ЕВС ніяк канкрэтна не патлумачыў, якія менавіта палітычныя матывы ўтрымлівае кампазіцыя.
"Можна да любога слова прывязаць што заўгодна", - лічыць Бутакоў.
Еўрапейскі вяшчальны саюз (ЕВС) прапанаваў групе памяняць песню. Па словах спевака, для бэнда гэта не склала працы.
Па дзве штукі на тыдзень
"Мы іх па дзве штукі на тыдзень пішам, у нас ужо штук шэсць напісана. Вось нават парачку выбралі, паслалі, які іх лёс далей - я не ведаю", - падзяліўся лідэр групы.
Зараз кампазіцыі ў працэсе апрацоўкі і аранжыроўкі, рыхтуюцца відэаверсіі.
"Штосьці будзе да канца месяца. Пра зайчыкаў будзе песня, напрыклад. Адна трошкі такая вясёлая, другая - больш значная. Будзем чакаць, якую выберуць", - сказаў Бутакоў.
Апісваючы жанр песень, лідэр бэнда адзначыў, што ўсё будзе "олд-скульна, дзесьці па-старэчы, у добрым сэнсе". Акрамя таго, варта чакаць песень у "больш рокавай" манеры.
Большасць хейтэраў - з Беларусі
Бутакоў упэўнены: на Захадзе песня "Я навучу цябе" спадабалася публіцы.
"Мяркуючы па ўсім, большасць вось гэтых хейтэраў - яны дзесьці тут у Беларусі ці каля таго ўтварыліся. А на Захадзе адэкватныя дарослыя людзі абсалютна нармальна ўспрымаюць песню, нават хваляць і песні напяваюць. Мне дасылалі англійскую версію, дзеці спяваюць і на скрыпачцы граюць. І па радыё гэтую песню круцяць у нас, ва Украіне, ва Уладзівастоку, Казахстане, Канадзе. Песня ў народ пайшла. Усё нармальна", - рэзюміраваў спявак.
Скандал на "Еўрабачанні"
Выбар прадстаўніка Беларусі ў гэтым годзе прайшоў без правядзення нацыянальнага адбору, рашэнне прымала "Белтэлерадыёкампанія". Пра тое, што краіну прадставіць група "Галасы ЗМеста", стала вядома 9 сакавіка.
Першапачаткова група павінна была выканаць на конкурсе песню "Я навучу цябе". Кампазіцыя выклікала неадназначную рэакцыю сярод аўдыторыі YouTube: менш чым за суткі яна сабрала больш за паўмільёна праглядаў, 7,1 тысячы лайкаў супраць 42 тысяч дызлайкаў. Самі музыкі ўдзячны фанатам за цікавасць і падтрымку.
Аляксандр Лукашэнка пракаментаваў сітуацыю з конкурсам і назваў яго "добрым піярам". Беларусь падціскаюць па ўсіх франтах і нават на конкурсе "Еўрабачанне", упэўнены прэзідэнт.
Аднак ЕВС вырашыў, што песня ставіць пад сумненне непалітычны характар конкурсу. Артыстам прыйшлося выбіраць - унесці карэкціроўкі ва ўжо апублікаваную кампазіцыю або прадставіць новы варыянт.
Шэсцьдзесят пяты міжнародны песенны конкурс "Еўрабачанне" адбудзецца ў найбуйнейшым горадзе Нідэрландаў - Ратэрдаме - вясной 2021 года. Паўфіналы самай чаканай музычнай падзеі года пройдуць 12 і 20 траўня, а грандыёзны фінал - 22 траўня.
Чытайце таксама:
- "Галасы ЗМеста" рыхтуюць некалькі новых песень для "Еўрабачання" - Бутакоў
- Новы фармат "Еўрабачання-2021": што чакаць ад конкурсу ў гэтым годзе
- Ратэрдам гатовы прыняць "Еўрабачанне" ў 2021 годзе
