МІНСК, 29 кра – Sputnik. Вясна бягучага года ў Беларусі можа ўвайсці ў лік самых халодных за ўсю гісторыю назіранняў, але пакуль глабальныя рэкорды не пабітыя, паведамілі ў Гідрамеце.
"Трэцяя дэкада красавіка ў гэтым годзе ў цэлым атрымалася адной з найбольш халодных за ўсю гісторыю назіранняў, такі тэмпературны рэжым больш характэрны не для канца красавіка, а для першай або другой дэкады сакавіка", – распавялі Sputnik кліматолагі Гідрамета.
Па словах суразмоўцаў агенцтва, на мінулых выходных, да прыкладу, сярэднясутачная тэмпература была каля +1°C у Езярышчы і амаль +5°C – у Брэсце.
"У трэцяй дэкадзе красавіка так холадна было ў 2005 годзе, гэта значыць амаль 16 гадоў не было ў канцы красавіка такіх нізкіх тэмператур", – удакладнілі кліматолагі.
Аднак, па словах суразмоўцаў агенцтва, па некаторых пунктах назірання такія нізкія тэмпературы ў трэцяй дэкадзе красавіка былі ў 2017, 2010 і ў 2009 гадах.
Вясновыя рэкорды
У Гідрамеце распавялі, што самая халодная вясна ў Беларусі за ўвесь перыяд метэаназіранняў была ў 1942 годзе – тады сярэдняя тэмпература сезона была +2°C. Другое месца па самых халодных вёснах падзялілі 1917 і 1980 гады з сярэдняй вясенняй тэмпературай 2,9°C.
Самая цёплая вясна на тэрыторыі Беларусі была ў 1921 годзе, з сярэдняй тэмпературай +10,3°C, на другім месцы – 2014 год з сярэдняй вясенняй тэмпературай + 9,5°C.
Нормай вясновай тэмпературы для Беларусі лічыцца + 6,9°C.
Пацяпленне клімату не адмяняецца
Закранаючы тэму змены клімату, спецыялісты адзначылі, што, не гледзячы на тое, што здараюцца халодныя і пазнейшыя вёсны, тэндэнцыя пацяплення клімату не памянялася.
"У апошнія гады ў нас наадварот адзначаецца пачатак кліматычнай вясны ў канцы лютага, калі тэмпература пераходзіць праз нуль. І тое, што мы назіраем у гэтым годзе ў красавіку, не абвяргае пасыл пра тое, што ідзе пацяпленне клімату", - сказалі спецыялісты.
Пры гэтым яны нагадалі, што 2002 год у Беларусі быў самым цёплым за ўсю гісторыю метэаназіранняў.
