Які штраф прыйдзецца заплаціць за адмову сартаваць смецце?
© Sputnik / Ирина Букас
Падпісацца
У Мінпрыроды распавялі пра адказнасць жыхароў за няправільны збор бытавых адходаў.
МІНСК, 12 жні – Sputnik. Больш за дзевяць тысяч фактаў размяшчэння адходаў у несанкцыянаваных месцах было выяўлена ў Беларусі ў выніку праверак у першым паўгоддзі, распавяла начальнік галоўнага ўпраўлення рэгулявання абыходжання з адходамі, біялагічнай і ландшафтнай разнастайнасці Мінпрыроды Вольга Сазонава ў мультымедыйным прэс-цэнтры Sputnik Беларусь.
"Да адміністрацыйнай адказнасці прыцягнуты 494 вінаватыя асобы, сума спагнання склала больш за 175 тысяч рублёў", - сказала Сазонава.
Па словах спікера, расстацца з прыстойнай сумай можна не толькі пакінуўшы гару смецця пасля пікніка ў лесе або на вадаёме. Буйны штраф можна атрымаць нават ва ўласным двары, калі няправільна выкінуць смецце.
"Калі будзе зафіксаваны факт, што грамадзянін пры наяўнасці кантэйнераў для раздзельнага збору адходаў не ажыццяўляе гэты збор, ён можа быць прыцягнуты да адміністрацыйнай адказнасці. За парушэнні заканадаўства аб абыходжанні з адходамі пагражае накладанне штрафу да 30 базавых велічынь (870 рублёў - Sputnik)", - сказала Сазонава.
Раздзельны збор смецця: якія стымулы?
Як адзначыў намеснік дырэктара ДУ "Аператар другасных матэрыяльных рэсурсаў" Арцём Шкрыль, умовы для паасобнага збору адходаў ужо створаны практычна па ўсёй краіне. Паводле яго слоў, у рэспубліцы ўстаноўлена каля 300 тысяч кантэйнераў для раздзельнага збору смецця ў шматкватэрнай жылой забудове.
"Таксама за кошт сродкаў нашага прадпрыемства ў апошнія гады было набыта каля 500 тысяч кантэйнераў для індывідуальнай жылой забудовы - прыватных дамоў, каб людзі маглі сартаваць адходы. Калі казаць пра маштабы, насельніцтва Беларусі на 93% забяспечана ўмовамі для паасобнага збору смецця", - сказаў Шкрыль.
На думку ўдзельнікаў прэс-канферэнцыі, яшчэ адным стымулам для паасобнага збору смецця стала развітая сетка прыёма-нарыхтоўчых пунктаў. У рэспубліцы іх дзейнічае 1680.
"Тарыфы ўсталёўваюцца непасрэдна нарыхтоўчымі арганізацыямі. Дзяржава не рэгулюе кошты на прыём другаснай сыравіны. У сярэднім макулатуру прымаюць па 26 кап за кг, шкло - 12 кап, пластык - 25 кап за кг", - сказаў Шкрыль.
Таксама ён прывёў канкрэтны прыклад: калі сярэднестатыстычная сям'я будзе здаваць другсыравіну, то атрымаецца на траціну скараціць плату за паслугу па абыходжанні з цвёрдымі камунальнымі адходамі.
"У сувязі з гэтым цікавыя лічбы статыстыкі. 61% грамадзян выкарыстоўваюць кантэйнеры для паасобнага збору адходаў. 9,5% нясуць другсыравіну у прыёмныя пункты. І толькі 6% апытаных адзначылі, што да асобнага збору іх матывуе магчымасць зарабіць", - адзначыў спікер.
Па словах прадстаўніка Мінпрыроды, беларусаў у першую чаргу хвалююць пытанні экалогіі. Гэта самая актуальная тэма, па якой звяртаюцца грамадзяне ў міністэрства.
Чытайце таксама:
Польскія ўлады шукаюць беларуса за... уборку смецця ў лесе
Экаабаронцы выступаюць за забарону на запуск шарыкаў у школах
Як у Вене: смеццеспальвальны завод плануюць пабудаваць у Мінску
Кантэйнеры для пратэрмінаваных лекаў з'явяцца ў Мінску
Межы закрыліся, а пластык застаўся: як чысцяць пляжы на Балі
