Як выглядае калючы плот, які Польшча будуе на мяжы

Міністэрства абароны Польшчы абвясціла аб будаўніцтве збудавання даўжынёй сто кіламетраў і вышынёй два з паловай метры ўздоўж мяжы з Беларуссю пасля значнага павелічэння колькасці бежанцаў.

Ужо пабудавана некалькі кіламетраў трохсекцыйнай агароджы недалёка ад вёскі Номікі.

Польскія салдаты выгружаюць матэрыялы для будаўніцтва плота з калючага дроту.

Як раней заяўлялі ў мінабароны Польшчы, плот ускладніць незаконны пераход мяжы мігрантамі і зробіць мяжу больш бяспечнай.

Напярэдадні ў нядзелю польскія памежнікі затрымалі 13 чалавек (12 грамадзян Польшчы і адзін грамадзянін Нідэрландаў), якія разбурылі загароду, яны панясуць крымінальную адказнасць.

З пачатку жніўня польска-беларускую мяжу незаконна спрабавалі перасячы больш за 2 тыс. чалавек. За ўвесь 2020-ы год такіх спробаў было ўсяго 120. Да аховы мяжы з Беларуссю з 18 жніўня прыцягнута польская армія.

Польскі салдат працуе над будаўніцтвам плота з калючага дроту на мяжы з Беларуссю ў Зубжыцэ-Вельке недалёка ад Беластока.

Агульная працягласць беларуска-польскай мяжы - 398,624 км.

На працягу двух тыдняў каля 30 мігрантаў пражываюць у імправізаваным лагеры паміж Беларуссю і Польшчай. Польскія салдаты і памежнікі не дазваляюць ім уехаць у краіну. Іх вымушанае знаходжанне паміж узброенымі беларускімі афіцэрамі і польскімі салдатамі выклікала абурэнне ў многіх палякаў.