Забудова Тарасава: жыхары прэстыжнай вёскі не жадаюць станавіцца горадам

© Sputnik / Виктор ТолочкоЗабудова Тарасава: жыхары прэстыжнай вёскі не жадаюць станавіцца горадам
Забудова Тарасава: жыхары прэстыжнай вёскі не жадаюць станавіцца горадам - Sputnik Беларусь, 1920, 05.11.2021
Падпісацца на
У прысталічную вёску Тарасава летам прыйшла навіна: яе плануюць забудаваць гмахамі, магазінамі, кавярНЯмі, паркінгамі... Бонусам абяцаюць дзіцячы сад, пошту, паліклініку і басейн. Але мясцовыя супраць: не за гэтым з'яжджалі ў вёску, хай і ўсяго ў кіламетры ад МКАД.
Новы генплан Тарасава мяркуе забудову паўднёвай тэрыторыі, якая ўшчыльную прымыкае да трасы М6. Там з'явяцца 12 шматпавярховак і 26 таунхаусаў. Колькасць жыхароў вёскі вырасце ў два разы: з сёлетніх 2,4 да 5 тысяч чалавек. Кватэрныя дамы з'явяцца да 2025 года, прыватнае жыллё - да 2035-га. Сама вёска пашырыцца і, магчыма, нават увойдзе ў склад Мінска.
Тройчы ўлады арганізоўвалі грамадскае абмеркаванне праекту, якое праходзіла ў фармаце відэаканферэнцыі, апошняе адбылося 2 лістапада. Якое ж рашэнне прынялі чыноўнікі? А што думаюць мясцовыя жыхары? Карэспандэнты Sputnik з'ездзілі ў Тарасава, якое ўжо ў найбліжэйшай будучыні чакае сур'ёзнае ўшчыльненне.

"Будзем спадзявацца, што ўсё як звычайна зацягнецца"

Размовы аб грандыёзнай будоўлі ў элітнай вёсцы Тарасава вяліся з 2014 года. Менавіта тады на ўездзе ў населены пункт з'явіўся вагон-бытоўка, а тэрыторыю, дзе планавалася ўзвядзенне гандлёва-забаўляльнага комплексу (так паказалі на пашпарце аб'екта), абнеслі вялізным плотам. Але працы так і не пачаліся. З таго часу плот струхлеў. На месцы пусткі, якая адводзілася пад забудову, зараз пасуцца каровы.
© Sputnik / Виктор ТолочкоНа пустцы, якую адводзілі пад забудову, цяпер пасуцца каровы
 На пустыря, который отводили под застройку, теперь пасутся коровы - Sputnik Беларусь, 1920, 05.11.2021
На пустцы, якую адводзілі пад забудову, цяпер пасуцца каровы
Як высветлілася, праект не замарожваўся, а праходзіў мадэрнізацыю. Гандлёва-забаўляльны комплекс ператварыўся ў "шматфункцыянальны", а ў генплане з'явіліся новыя дарогі і камунікацыі, сацыяльная інфраструктура і транспарт.
У цэлым ідэя аб будаўніцтве на невялікай пустцы новага мікрараёна мясцовым адразу прыйшлася не даспадобы. Вось што пра гэта кажа жыхар Тарасава Павел:
"Уявіце: за некалькі метраў ад нашых таунхаусаў з'явіцца шырокая чатырохпалосная дарога. Трафік будзе шалёны! Тыя дамы, якія плануюць пабудаваць, нібыта нікому перашкаджаць не будуць, але трафік… Людзям не падабаецца. Паліклініка і дзіцячы садок? Не бачу ў іх сэнсу. Бліжэйшая паліклініка ёсць у Ждановічах, ды і да Мінска рукой падаць", - тлумачыць ён.
Новую дарогу, паводле слоў яшчэ адной мясцовай жыхаркі Марыі, будуць весці з Ратамкі да самай кальцавой. Яна пройдзе праз Тарасава паралельна існуючай вуліцы Ратамскай, на якой пабудаваны таунхаусы, і "уткнецца" ў МКАД у раёне Казіміраўскай.
© Sputnik / Виктор ТолочкоПобач з дарогай каля таунхаусаў пабудуюць чатырохпалосную магістраль да Мінска.
Рядом с дорогой возле таунхаусов построят четырехполосную магистраль до Минска - Sputnik Беларусь, 1920, 05.11.2021
Побач з дарогай каля таунхаусаў пабудуюць чатырохпалосную магістраль да Мінска.
"Будзем патрабаваць, каб ад нас рабілі зялёную зону, потым шчыты шумаахоўныя ставілі, а там ужо дарогу будавалі. Не паставяць шчыты, будзем за свой кошт ставіць. Так, можа, у нас інфраструктура палепшыцца, транспарт пачне хадзіць часцей. Але ці будуць яны будаваць? Таму што некалькі разоў ужо збіраліся пачаць будоўлю, але ўсё ніяк. Мы, вядома, спадзяемся, што ўсё зацягнецца, як звычайна, і тут нічога не пабудуюць", - прызнаецца жанчына.
Паводле яе слоў, акрамя будаўнічых праблем, якія чакаюцца ў бліжэйшую пяцігодку, у Тарасава хапае цяперашніх камунальных пытанняў - пакуль, на жаль, нявырашаных.
"Напор вады летам проста жудасны, увечары дзяцей наогул не памыць. Тым, хто жыве на другім паверсе таунхаусаў, вада практычна не паступае. Мясцовыя артэзіянскія свідравіны не спраўляюцца з нагрузкай, ламаюцца помпы. Раней святло часта знікала, пакуль новую трансфарматарную станцыю не паставілі. Таксама нам казалі, што ўсе камунікацыі будуць падлучаныя да горада. Але, шчыра кажучы, лепш мець свае свідравіны, чым піць хлараваную ваду з Каменнай Горкі”, - запэўнівае Марыя.

"З'ехалі з горада, каб зноў жыць у горадзе?"

Жыхарка Тарасава Юлія пераехала з Мінска некалькі месяцаў таму. І тут адразу навіны аб будоўлі.
"Мы, вядома, не вельмі за… Баімся дарогі, якая тут будзе. У нас тут дзеці на роварах і самакатах катаюцца. І мы спакойныя. Але як з'явіцца дарога, то ўсё… Нам тут цудоўна без паліклінік і крамаў, якія збіраюцца пабудаваць. Можа, жыхарам Тарасава, хто жыве далей, гэта ўсё трэба, але нам - не... Мы раней на Нямізе жылі, задыхаліся ад горада... У двор выходзіш, а там настойка баярышнікаля пад'езда ляжыць, бамжы п'юць, к***шкі ў пясочніцы валяюцца. А тут - добра", - адзначае дзяўчына.
Пенсіянерка, якая праходзіла міма, падключаецца да размовы. Марыя Іванаўна жыве ў Тарасава з 1983 года. Участак у цэнтры вёскі яна атрымала бясплатна як камуністка. На яе думку, у вёсцы, дзе ёсць толькі прыватная школа на 10 чалавек, патрэбны дзіцячыя сады і школы.
"Тут жа столькі маладых жыве - школы і дзіцячыя сады ў вёсцы патрэбны. А яны ўсе подпісы збіраюць (за адмену будоўлі - Sputnik)", - канстатуе пенсіянерка.
"Мы супраць ведаеце чаму? – адказвае ўжо іншая жанчына, Галіна, якая таксама падключылася да размовы. - Аўтамабільны трафік, які тут прагназуецца - самы вялікі мінус. Цяпер мы як у вёсцы - лес, поле - а потым з'явяцца шматпавярхоўкі. З'ехалі з горада дзеля чаго - каб зноў жыць у горадзе? Трэба рабіць так, каб людзям было зручна. А дзе тут дамы ставіць? Мы ходзім па гэтым полі з дзецьмі, там ад сілы 300 "квадратаў". Куды там дом ставіць? Гэта будзе мурашнік. Калі б тут паставілі некалькі таунхаусаў, крамак, то ніхто не скардзіўся б", – тлумачыць яна.
© Sputnik / Виктор ТолочкоЖыхарка Тарасава Галіна
Жительница Тарасово Галина - Sputnik Беларусь, 1920, 05.11.2021
Жыхарка Тарасава Галіна
Але, здаецца, большасць жыхароў ужо змірыліся з будучым лёсам. На днях улады правялі чарговае грамадскае абмеркаванне па праекце генплана забудовы. Узвядзеннем дамоў і прылеглай інфраструктуры зоймецца кампанія "Рэторсія Трэйд".

Што гавораць улады і забудоўшчык?

Участак, прызначаны пад будаўніцтва, зараз пераводзіцца з разраду сельскагаспадарчых у разрад зямель, прызначаных для абслугоўвання жыллёвага комплексу. Ён будзе складацца з трох-, пяці- і сяміпавярховых дамоў.
Акрамя гэтага, плануецца пабудаваць дзіцячы садок на 150 месцаў, паліклініку на 200 наведванняў у змену і двухпавярховы ГЦ з паркінгамі, аддзяленнем пошты, банка і КБА. Паводле слоў кіраўніка праекта Вадзіма Кіслякова, забудова будзе тэрасная, "каб гарманічна ўлівацца ў від вёскі". Агульная плошча жылых аб'ектаў - каля 60 тысяч квадратных метраў. Генплан ужо знаходзіцца на стадыі праходжання экспертыз.
Абмеркаванне пачалося з прэтэнзіі жыхаркі Тарасава аб тым, чаму ўзвядзенне дзіцячага сада плануецца пасля будаўніцтва ўсіх жылых дамоў.
"У вёсцы няма ні школы, ні дзіцячага сада. У горадзе ўладкаваць дзіця ў школу практычна нерэальна. Чаму вы разглядаеце ўзвядзенне дзіцячага сада ў апошнюю чаргу? Чаму гэты праект не прадугледжвае будаўніцтва школы? Нам не патрэбны камерцыйныя аб'екты тыпу крам і паркінгаў. А патрэбная школа, таму што дзецям няма куды хадзіць вучыцца", - рэзюмавала жанчына.
Прадстаўнік забудоўшчыка растлумачыў, што школы ў праекце не прадугледжана, а будаўніцтва дзіцячага садка будзе ўзята на кантроль.
© Sputnik / Виктор ТолочкоЖыхары прэстыжнай вёскі не хочуць станавіцца горадам
Застройка Тарасово: жители престижной деревни не хотят становиться городом - Sputnik Беларусь, 1920, 05.11.2021
Жыхары прэстыжнай вёскі не хочуць станавіцца горадам

Дарогі і транспарт

Другое пытанне, якое набіла аскому мясцовым жыхарам, - дарога, якая пройдзе транзітам праз вёску і працягнецца да самага МКАД. На думку жыхароў, гэта прывядзе да калапсу, які і так часта здараецца на ўездзе ў вёску з трасы М6. Пры гэтым па генплане ўзровень аўтамабілізацыі мясцовага насельніцтва да 2025 года вырасце са 105 да 370 машын на 1000 жыхароў.
"А вы спрабавалі з раніцы па існуючым з'ездзе выехаць з Тарасава на трасу? І колькі будзе машын, калі з'явіцца новы раён?", - задаўся пытаннем адзін з удзельнікаў грамадскага абмеркавання, жыхар пасёлка.
Забудоўшчык растлумачыў, што па ўмовах ДАІ ён будзе праводзіць разлік транспартных патокаў. Толькі пасля гэтага будзе зразумела, пашыраць участкі вуліц або будаваць дадатковыя палосы перад скрыжаваннямі.
Таксама мясцовых жыхароў цікавіла пытанне, ці будзе цяжкая тэхніка ездзіць па населеным пункце падчас будаўнічых работ.
“Будуць пабудаваны часовыя дарогі і камунікацыі. Цяжкая тэхніка далей скрыжавання (на Ратамку - Sputnik) заязджаць не будзе. Пешаходныя дарожкі будуць з узмоцненым пакрыццём, каб змаглі вытрымаць камунальную і дарожную тэхніку. На этапе праектавання з'явяцца дадатковыя праезды і месцы для інвалідаў, а таксама бяспечныя пераходы праз дарогу, якая праляжа праз Тарасава", - растлумачыў галоўны архітэктар праекта Дзмітрый Давідовіч.
Ва ўдзельнікаў абмеркавання ўзнікла пытанне наконт таго, як у вёску, насельніцтва якой да 2025 года павялічыцца ўдвая, будзе хадзіць грамадскі транспарт. Зараз сюды з Мінска ездзіць адзін аўтобус - раз у тры гадзіны, а найбліжэйшы прыпынак ад цэнтра планаванай забудовы знаходзіцца ў 800 метрах.
"Генпланам будуць вызначаны радыусы даступнасці прыпынкаў грамадскага транспарту. Яны таксама будуць закладзены ў праектнае рашэнне. Канкрэтныя рашэнні аб увядзенні новых маршрутаў будуць прымаць мясцовыя ўлады", - канстатавалі кіраўнікі праекта.
Рэндэр забудовы Тарасава
Рендер застройки Тарасово - Sputnik Беларусь, 1920, 05.11.2021
Рэндэр забудовы Тарасава

Тарасава падключаць да Мінска?

Асобным пунктам удзельнікі абмеркавання спыніліся на камунікацыях, якія існуюць у вёсцы. Ці будуць вёску пераводзіць на цэнтралізаванае вода- і газазабеспячэнне?
"Ні да адной існуючай у вёсцы камунікацыі новы мікрараён падключацца не будзе. Ацяпленне ў новых дамах будзе газавае - гэта ў прыярытэце. Забяспечваць вадой і новы мікрараён, і ўсю вёску прапануецца цэнтралізавана: падключаць будуць да трубы на вуліцы Казіміраўскай у Мінску. Усе існуючыя камунікацыі, якія трапляюць у "пляму" забудовы, будуць вынесены за яе межы. Ніхто вас не абрэжа ад сувязі, воды і электрычнасці. Пераключэнне кабеляў адбываецца на працягу некалькіх гадзін”, – запэўніў жыхароў Тарасава кіраўнік праекту Зміцер Грынкевіч.
Паводле яго слоў, захаваецца і лесапаласа ў максімальна магчымых межах. Ачышчальныя збудаванні пад дажджавыя сцёкі будуць размяшчацца на дапушчальнай адлегласці ад жылых дамоў. Іх абсталююць бензамаслаачышчальнікамі, каб ужо чыстую ваду зліваць у раку Качынка.
© Sputnik / Виктор ТолочкоЗабудоўшчык абяцае, што ва ўсіх новых дамах будзе газавае ацяпленне
Застройщик обещает, что во всех новых домах будет газовое отопление - Sputnik Беларусь, 1920, 05.11.2021
Забудоўшчык абяцае, што ва ўсіх новых дамах будзе газавае ацяпленне

Другая "Новая Баравая"

Адна з жыхарак вёскі абурылася, чаму ў вёсцы будуць будавацца 7-павярховыя дамы - на яе думку, неабходна знізіць хаця б да чатырох.
"Заўвагі па паверхавасці будуць разгледжаны ў архітэктурнай радзе пасля завяршэння грамадскага абмеркавання, якое працягнецца да 12 лістапада", - канстатавала намеснік начальніка ўпраўлення архітэктуры і будаўніцтва Мінскага райвыканкама Кацярына Зайцава.
Аб сярэднім кошце "квадрата" у новых дамах у Тарасава забудоўшчык пакуль казаць не стаў, паколькі кошт на метал і драўніну пастаянна расце.
"Прадказаць, якая будзе сітуацыя праз пару гадоў, пакуль складана. Цяпер на кошт жылля ў асноўным уплываюць не спажывецкія якасці, а кошт зямельнага ўчастка. Да прыкладу, панэльны дом на Харужай даражэй, чым маналітны дом на Карла Лібкнехта. Хутчэй за ўсё, і тут будуць маналітныя дамы. Але сказаць, што гэта будзе таннае жыллё, таксама нельга", - заўважыў прадстаўнік кампаніі-забудоўшчыка.
Яшчэ адна жанчына спытала, якой коштавай катэгорыі будзе забудова і ўвогуле ці трапіць яна пад паняцце "элітнае жыллё". На яе думку, трэба паставіць высокі цэннік на кватэры, каб "гэта не ператварылася ў чарговы спальнік Каменнай Горкі".
"Адно можам сказаць напэўна: гэта будуць палепшаныя па якасці дамы, але эканоміка будзе працаваць пасля таго, як з'явяцца хаця б папярэднія разлікі па будаўніцтве... Гэта будзе ўзровень "Новай Баравой", - рэзюмавалі ў кампаніі, якая будзе займацца забудовай Тарасава.
Стужка навiн
0
Спачатку новыяСпачатку старыя
loader