Саюзныя праграмы могуць рэалізаваць хутка: эксперт аб выніках Дзяржсавета
17:14 06.11.2021 (абноўлена: 17:17 06.11.2021)
© Sputnik / Виктор Толочко
Падпісацца
Моцная і эфектыўная Саюзная дзяржава патрэбна як Беларусі, так і Расіі. Пры гэтым для расійскага боку найбольш важным з'яўляецца геапалітычны фактар, а для беларускага - эканамічны, мяркуе спецыяліст.
МІНСК, 6 ліс – Sputnik. Расія і Беларусь могуць дастаткова хутка гарманізаваць заканадаўства па падпісаных саюзных праграмах, заявіла Sputnik доктар эканамічных навук загадчыца кафедры менеджменту, тэхналогій бізнесу і ўстойлівага развіцця БДТУ Ірына Новікава.
Паводле яе слоў, працэсы глабалізацыі ў свеце сталі прыпыняцца, а ў супрацоўніцтве краіны ўжо робяць акцэнт на лакальныя інтэграцыйныя аб'яднанні.
"Практычна няма ніводнай краіны ў свеце, якая не ўваходзіла б хоць у адну рэгіянальную групоўку. Таму што глабалізацыя паказала сваю няслушнасць. Таму мы інтэгруемся ў трох групоўках – Саюзная дзяржава, ЕАЭС і СНД. Гэта што датычыцца эканомікі", - адзначыла Новікава.
Узорны праект
Яна лічыць, што Саюзная дзяржава шмат у чым узорны праект на постсавецкай прасторы, на які раўняюцца і іншыя інтэграцыйныя аб'яднанні.
"Ужываецца нават такі тэрмін - "палігон", на якім ідзе выпрабаванне рознага роду ідэй і рашэнняў. А потым гэта выкарыстоўваецца ў ЕАЭС, да прыкладу", - заявіла эксперт.
На думку Новікавай, пасля падпісання дарожных карт інтэграцыйныя працэсы ў СД пойдуць значна хутчэй.
Адзіны энергарынак – прыярытэт
Збліжэнне заканадаўстваў па праграмах можа адбыцца ў хуткім часе, мяркуе эксперт.
"У розных карт розны тэрмін рэалізацыі. Калі казаць пра агульныя энергетычныя рынкі, то гэта 2023-2024 гады, а гэта важна для Беларусі. Таму што энергетычны рэсурс, які з'яўляецца састаўной часткай сабекошту прадукцыі. Пакуль мы па цэне можам прайграваць. І калі можна хутчэй стварыць агульны энергарынак – то гэта нядрэнна для Беларусі", - адзначыла яна.
У больш хуткім стварэнні адзінага рынку электрычнай энергіі таксама зацікаўлены беларускі бок, таму што запушчана БелАЭС, электраэнергіі ў рэспубліцы з лішкам.
“Тая колькасць электраэнергіі, якую можа вырабляць на поўную моц станцыя, гэта для адной Беларусі вельмі шмат. Так, быў разлік на тое, што заходнія суседзі будуць купляць электраэнергію, але так палітычна склалася, што яны адмаўляюцца. Хаця я думаю, што яны ў выніку прыйдуць да таго, што ўсё ж стануць купляць электрычнасць. І гэтаму таксама вельмі дапаможа адзіны рынак электраэнергіі", - пераканана Новікава.
Адмена роўмінгу і хуткія плацяжы
Паводле слоў эксперта, у бліжэйшы час будзе канчаткова вырашана пытанне адмены роўмінгу, дастаткова хутка будзе вырашана пытанне аб адкрыцці рахункаў рэзідэнтамі ў банках-нерэзідэнтах.
"Сістэма хуткіх плацяжоў Беларусі і Расіі – гэта калі з аднаго рахунку на іншы ўнутры сістэмы можна будзе імгненна перакідваць сродкі. Гэта асабліва добра для малога бізнесу. Таму што ён у нас стварае сёння 50% ВУП", - дзеліцца меркаваннем па інтэграцыйным працэсе беларускі эканаміст.
А вось пытанні грашова-крэдытнай палітыкі, сацыяльнай сферы і падатковай палітыкі могуць запатрабаваць больш працяглага абмеркавання і збліжэння законаў дзвюх краін.
"Таму ідэю адзінай валюты пакуль абмяркоўваць няма сэнсу, у бліжэйшыя 10 гадоў так дакладна", - расказала Новікава.
Каму больш патрэбен Саюз?
На пытанне, каму больш патрэбны інтэграцыйныя збліжэнні краін, эксперт выказала перакананне, што трывалы і эфектыўны Саюз патрэбны двум бакам.
"Палітычна Саюз патрэбны больш Расіі, а эканамічна – Беларусі. Для нашай рэспублікі ўсё ж важней эканоміка, тыя ж энергарэсурсы. А для Расіі Саюз больш цікавы з пазіцыі геапалітыкі. Таму што Беларусь – такі прахадны калідор у Еўропу. І Расія, лагічна, зацікаўлена ў тым, каб Беларусь усяляк была значна бліжэй да яе, чым да Захаду", - падсумавала эканаміст.
У мінулы чацвер 4 лістапада прайшло пасяджэнне Вышэйшага дзяржсавета Саюзнай дзяржавы Беларусі і Расіі, якое правялі ў рэжыме відэаканферэнцыі. На пасяджэнні кіраўнікі дзяржаў падпісалі дэкрэт аб асноўных напрамках рэалізацыі дагавора аб стварэнні Саюзнай дзяржавы на 2021-2023 гады. Дакументам зацверджаны 28 саюзных праграм па паглыбленні інтэграцыі. Былі таксама зацверджаны новая ваенная дактрына СД і канцэпцыя міграцыйнай палітыкі.
6 лістапада 2021, 16:52
Таксама на Sputnik:
Адзіная валюта ў Беларусі і Расіі пакуль не абмяркоўваецца, заявіў Мезенцаў
У Саюзнай дзяржаве можа з'явіцца медыяхолдынг
Лукашэнка і Пуцін падпісалі дэкрэт, які зацвярджае саюзныя праграмы
Лукашэнка: Саюзная дзяржава для Беларусі - прыярытэт з прыярытэтаў
Пасяджэнне Вышэйшага дзяржсавета Беларусі і Расіі - трансляцыя
