Масленіца ў разгары: самыя смачныя рэцэпты бліноў
10:26 21.02.2023 (абноўлена: 17:15 01.03.2023)
© Sputnik / Сергей Лескеть
Падпісацца
Масленічны тыдзень у самым разгары – гэта час, калі трэба весяліцца і пекчы блінцы. З гэтай нагоды Sputnik падрыхтаваў топ-5 блінных рэцэптаў.
Масленіца, якую ўсходнія славяне адзначаюць цэлы тыдзень, у 2023 годзе прыйшлася на тыдзень з 20 па 26 лютага. Свята адзначаецца перад Вялікім пастом, а акрамя таго азначае памежны час паміж зімой і вясной.
Кожны дзень на Масленіцу мае сваё значэнне і "расклад". У даўніну ў панядзелак хадзілі ў госці да сватоў, планавалі гулянні, рабілі пудзіла. У аўторак усе каталіся з горкі, а большасць абрадаў мела сваёй мэтай сватаўство. У сераду цешча клікала зяця на бліны і павінна была прадэманстраваць сваю прыхільнасць да яго. У чацвер, першы дзень Шырокай Масленіцы, ладзілі разнастайныя вулічныя гулянні, якія завяршаліся вясёлымі застоллямі, рытуальнымі скокамі, спевамі абрадавых песень. У пятніцу цешча наносіла дачцэ візіт у адказ, а тая пякла бліны. Суботу прысвячалі дзявочым пасядзелкам з сяброўкамі і сваякамі. Кульмінацыя ўсяго тыдня прыпадала на нядзелю — людзі прасілі адзін у аднаго прабачэння, паміналі нябожчыкаў, парыліся ў лазні, палілі пудзіла і рэшткі святочнай ежы.
А вось, што датычыцца святочнага стала, пачыналася і завяршалася Масленіца з блінамі.
Хатнія тонкія блінцы
З чаго гатаваць:
3 яйкі,
500 мл малака,
280 г мукі,
3 ст. л. алею,
1 ст. л. цукру,
1 ч. л. солі.
Блінцы можна аздабляць цукровай пудрай, мёдам, варэннем, рознымі ягадамі
© Pixabay/RitaE
Як гатаваць. У місцы злёгку ўзбіць яйкі з цукрам і соллю. У атрыманую сумесь уліць палову падрыхтаванага халоднага малака. Змяшаць калатоўкай, каб атрымалася маса аднастайнай кансістэнцыі. Муку прасеяць праз дробнае сіта і патроху дадаць у яечна-малочную сумесь, змешваючы да атрымання цеста кансістэнцыі аднастайнай смятаны. Вельмі важна, каб не было камячкоў. Дадаць у цеста рэшткі малака і старанна змяшаць калатоўкай. Потым уліць алей, яшчэ раз змяшаць. Лепш за ўсё гатаваць гэтыя блінцы на чыгуннай патэльні, вышмараванай алеем.
Тонкія заварныя бліны на малаку і вадзе
З чаго гатаваць:
2 яйкі,
300 мл малака,
150 г мукі,
150 мл вады,
30 мл алею,
2 ст. л. цукру,
0,5 ч. л. солі.
Бліны з аржаной мукі
© Sputnik / Ларыса Мятлеўская
Як гатаваць. У глыбокай місцы ўзбіце яйкі ў пену. Дадайце туды цукар, соль і палову падрыхтаванага малака. Змяшайце, дадайце муку і замясіце аднастайнае цеста. Уліце рэшту малака, змяшайце і дадайце кіпячую ваду. Зноў змяшайце і ўвядзіце ў цеста алей. Старанна ўзбіце масу калатоўкай. Патэльню вышмаруйце алеем і распаліце на сярэднім агні.
Тонкія бліны на сыроватцы
З чаго гатаваць:
1 л малочнай сыроваткі,
2 яйкі,
300 г пшанічнай мукі,
50 г крухмалу,
0,5 ч. л. соды,
50 г сметанковага масла,
500 мл сыроваткі, даведзенай да кіпення на сярэднім агні,
1 ст. л. цукру,
1 ч. л. солі.
Як гатаваць. У глыбокай місцы злучыце яйкі, цукар і соль. Затым уліце 500 мл некіпячонай сыроваткі і акуратна ўсыпце папярэдне змешаную муку і крухмал. Кіпячоную сыроватку злучыце з содай і ўліце тонкім струменьчыкам у міску да астатніх інгрэдыентаў. Дбайна змяшайце. Цеста павінна атрымацца вадкім, але пышным. Сметанковае масла растапіце ў патэльні, уліце ў міску і зноў змяшайце. На сярэднім агні добра разагрэйце патэльню з рэшткамі алею.
Яблычныя бліны на малаку
З чаго гатаваць:
500 мл малака,
2 яйкі,
0,5 ч. л. молатай карыцы,
180 г мукі,
30 мл алею,
2 свежыя яблыкі,
1 ст. л. цукру,
10 г ванільнага цукру,
дробка солі.
Бліны – лепшая страва на Масленіцу
© Sputnik / Людмила Янковская
Як гатаваць. У глыбокай місцы калатоўкай узбіце малако, яйкі, звычайны і ванільны цукар, соль і карыцу. Акуратна ўсыпце муку і зноў узбіце. Уліце алей і зноў змяшайце. Яблыкі пачысціце, натрыце на буйнай тарцы і дадайце ў цеста. Яшчэ раз старанна змяшайце. Патэльню вышмаруйце алеем і нагрэйце на сярэднім агні. Выпякайце блінцы з двух бакоў, пакуль яны не падрумяняцца.
Заварныя бліны на кефіры
З чаго гатаваць:
500 мл кефіру,
2 яйкі,
300 г пшанічнай мукі,
1 ч. л. соды,
500 мл кіпеню,
50 мл алею,
2 ст. л. цукру,
1 ч. л. солі.
Ды якая ж Масленіца без бліноў?!
© Sputnik / Альфред Микус
Як гатаваць. У глыбокай місцы старанна ўзбіце калатоўкай кефір, яйкі, цукар і соль. Акуратна ўсыпце муку і замясіце аднастайнае цеста. Злучыце соду з кіпенем. Пачакайце некалькі секунд і, памешваючы цеста, уліце ў яго ваду. Узбіце і пакіньце на 5 хв. Затым уліце ў міску алей, зноў змяшайце. Блінную патэльню распаліце на сярэднім агні і вышмаруйце алеем перад выпяканнем першага бліна.
Смачнай Масленіцы!
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
