Карнавал па-беларуску: самыя яркія моманты фестывалю культур у Гродна - фота

Фестываль стартаваў з маляўнічага тэатралізаванага шэсця, за якім назіралі і гродзенцы, і госці горада.

Прадстаўнікі больш як 30 народнасцей прайшліся па цэнтральных вуліцах Ажэшкі і Савецкай, а гледачы віталі іх, выстраіўшыся ўздоўж тратуараў.

На чале калоны неслі вялікі сцяг з сімвалам фестывалю - кветкай з пялёсткамі ўсіх колераў вясёлкі.

Удзельнікі шэсця імкнуліся паказаць не толькі нацыянальныя строі – яны таксама спявалі нацыянальныя песні і выконвалі народныя танцы.

Цыганы праз кожныя 30 метраў рабілі прыпынкі, каб выканаць свае тэмпераментныя танцы.

Цыганам не саступала Грузія - тыя ж прыпынкі і не менш тэмпераментныя танцавальныя замалёўкі.

Украінцы неслі гіганцкі пяльмень.

Рускія - гралі на гармоніках, і спявалі песні, а ім падпявалі гледачы.

Фестываль нацыянальных культур стаў трынаццатым па ліку, а пасля заканчэння пандэміі каронавіруса - першым па-сапраўднаму масавым мерапрыемствам у Гродна.

У другі святочны дзень цэнтр Гродна запоўнілі тысячы людзей - тут адкрыліся дзясяткі нацыянальных падворкаў, і на кожным праходзілі канцэрты, гучала нацыянальная музыка, выконваліся народныя танцы.

Акрамя таго, тыя, хто прыйшоў на фестываль, змаглі стаць удзельнікамі розных майстар-класаў.

Госці мелі магчымасць прадэгуставаць нацыянальныя стравы і напоі.

Яўрэі частавалі мацой, рускія зладзілі грандыёзнае чаяванне, малдаване налівалі віно і частавалі пірагамі.

Вядома ж, на кожным падворку можна было набыць нацыянальныя стравы.

У дзень закрыцця фэсту, у нядзелю, за 30 кіламетраў ад Гродна на Аўгустоўскім канале і зусім быў аншлаг. Бліжэй да абеду машын на загараднай дарозе стала так шмат, што ўзнік сур'ёзны затор. Гасцям прыйшлося пакідаць машыны за тры кіламетры да святочнай лакацыі.

Самай "смачнай" падзеяй дня тут стаў конкурс на хуткаснае паяданне дранікаў, якія, дарэчы, з сярэдзіны мая гэтага года прызнаны гісторыка-культурнай каштоўнасцю Беларусі.

Удзельнікам прапанавалі за хвіліну з'есці па дзесяць знакамітых бульбяных аладак, прыгатаваных па дзесяці рэцэптах з розных рэгіёнаў Гродзенскай вобласці. У гэтым конкурсе не было прайграўшых. Самыя хуткія атрымлівалі ва ўзнагароду кружкі, а самыя павольныя - сыходзілі з-за стала з поўнай талеркай дранікаў, ды яшчэ са смятанай, скваркамі і каўбаскамі.

Фестываль нацыянальных культур лічыцца візітнай карткай Гродна, ён праводзіцца на працягу вось ужо амаль 30 гадоў з перыядычнасцю раз на два гады. Аднак, быў і незапланаваны перапынак: у 2020 годзе мерапрыемства адмянілі з-за пандэміі каронавіруса. Традыцыйна свята збірае дзясяткі тысяч гасцей і ўдзельнікаў самых розных нацыянальнасцей.