Калі можа з’явіцца адзіная валюта Саюза Беларусі і Расіі
17:53 23.12.2022 (абноўлена: 10:06 02.04.2024)
© Sputnik / Виктор Толочко
Падпісацца
Эксперты прагназіруюць істотнае павышэнне ўзроўню жыцця насельніцтва на фоне беларуска-расійскіх дамоўленасцей.
МІНСК, 23 сне – Sputnik. Інтэграцыйныя працэсы атрымалі новы імпульс па выніках сустрэчы прэзідэнтаў Расіі і Беларусі Уладзіміра Пуціна і Аляксандра Лукашэнкі ў Мінску. Як гэта паўплывае на павышэнне ўзроўню жыцця, расказалі вядомыя эксперты ў мультымедыйным прэс-цэнтры Sputnik Беларусь.
Як адзначыў галоўны рэдактар часопіса "Евразия. Эксперт", выканаўчы дырэктар Расійска-беларускага экспертнага клуба Вячаслаў Сутырын, Беларусь і Расія выходзяць на новы этап развіцця. Пунктам адліку цяперашніх падзей прынята лічыць падпісанне 28 саюзных праграм.
Паводле афіцыйнай інфармацыі, прадоўжыў ён, каля 60% мерапрыемстваў ужо рэалізавана – гэта мерапрыемствы нарматыўнага характару: прыняцце розных міжурадавых пагадненняў, актаў, норм у заканадаўстве дзвюх краін. Гэта работа вядзецца, і яна будзе працягвацца, але ёсць і шэраг важных новых рашэнняў, падкрэсліў эксперт.
"На сустрэчы прэзідэнтаў у Мінску было заяўлена аб тым, што дасягнуты дамоўленасці па цэнах на энерганосьбіты, перш за ўсё на газ. Гэта ўсё вельмі важны элемент, і гэта ўсё ўкладваецца ў логіку саюзных праграм, якія задалі дынаміку двухбаковым адносінам", - сказаў Сутырын.
Эксперты канстатавалі, што штуршок саюзным адносінам, як ні парадаксальна, надалі санкцыі калектыўнага Захаду. Беларусь і Расія аператыўна пачалі рэалізацыю праграмы імпартазамяшчэння. Гэта значыць частку камплектуючых, якія атрымлівалі ад заходніх партнёраў, зараз Саюзная дзяржава будзе вырабляць на ўласных прамысловых магутнасцях.
Загадчыца кафедры менеджменту, тэхналогій бізнесу і ўстойлівага развіцця Беларускага дзяржаўнага тэхналагічнага ўніверсітэта, доктар эканамічных навук Ірына Новікава расказала, што ў ліку крытычнага імпарту ў першую чаргу значылася прадукцыя мікраэлектронікі.
"Не трэба забываць, што ў Савецкім Саюзе ў Беларусі было засяроджана вельмі шмат высокатэхналагічных прадпрыемстваў, якія належаць ваенна-прамысловаму комплексу. Расія выдзеліла больш за 100 мільярдаў рублёў пад пэўныя праекты. У тым ліку будуць мадэрнізаваны прадпрыемствы "Гарызонт" і "Планар". Гэта значыць будзе запушчана вытворчасць мікраэлектронікі ў інтарэсах Саюзнай дзяржавы", - сказала Новікава.
На думку экспертаў, ключавым напрамкам развіцця Саюзнай дзяржавы на бліжэйшыя два-тры гады стане менавіта праграма імпартазамяшчэння, стварэнне сумесных высокатэхналагічных вытворчасцей. Фактычна запушчаны праект новай індустрыялізацыі, па выніках якой прадукцыя Саюзнай дзяржавы зойме сваю нішу не толькі на ўнутраным, але і на сусветным рынку.
Зарплату трэба істотна павысіць
Сутырын адзначыў, што новыя высокатэхналагічныя вытворчасці будуць арыентаваны на выпуск прадукцыі з дастаткова высокім дабаўленым коштам, а значыць, з’явіцца значная колькасць новых высокатэхналагічных працоўных месцаў. У сваю чаргу стварэнне працоўнага месца ў прамысловасці мае вельмі вялікі ўплыў на стварэнне спадарожных працоўных месцаў у абслуговых галінах, у тым ліку малым і сярэднім бізнесе.
Па сутнасці, працягнуў эксперт, развіццё прамысловасці стане станавым хрыбтом эканомікі Саюзнай дзяржавы. У сваю чаргу краіны калектыўнага Захаду, бачачы ў Расіі і яе саюзніку Беларусі прамога канкурэнта, паводле законаў рынку, таксама дыверсіфікуюць напрамкі развіцця ўласных эканомік, сказаў Сутырын.
На гэта Новікава адзначыла, што тут адразу ўзнікае пытанне, колькі будуць атрымліваць інжынеры, каб яны зноў жа не з’ехалі ў Еўропу.
"Мы іх падрыхтуем, а заўтра яны паедуць і будуць працаваць за еўра і за долары. Вы звярніце ўвагу, што Байдэн адкрыта гаворыць у сваіх выступленнях, што яны чакаюць прафесійных матэматыкаў, фізікаў. Па аблегчанай працэдуры даюць візы. Хутка Еўропа пра гэта загаворыць. Ім спатрэбяцца інжынеры, будаўнікі і іншыя спецыялісты. Таму што сваіх рыхтаваць доўга і дорага. Значна прасцей пераманіць гатовых", - растлумачыла доктар эканамічных навук.
Эксперты сышліся на думцы, што павышэнне зарплат неабходна, каб захаваць кадры. І ў гэтым пытанні, падкрэслілі яны, важна не адштурхоўвацца ад канкрэтнай сумы, а браць да ўвагі агульны ўзровень камфортнага жыцця. Напрыклад, на Захадзе практычна няма сацыяльных праграм. Гэта значыць, чалавек плаціць за ўсё сам. У гэтым плане Саюзная дзяржава выйграе, паколькі дапамагае вырашыць пытанне ў комплексе – набыць жыллё, захоўвае бясплатную адукацыю і іншыя ключавыя напрамкі.
Калі з’явіцца валюта Саюзнай дзяржавы
Па словах экспертаў, сёння яшчэ рана казаць аб стварэнні адзінай валюты Саюзнай дзяржавы. Фактычна разлікі сёння і так ідуць у расійскіх рублях, гэта значыць бакі адмовіліся ад долараў і еўра, якія дыскрэдытавалі сябе.
"Магчыма, трэба думаць аб лічбавай валюце. Наш Нацыянальны банк сумесна з расійскім банкам праводзілі канферэнцыю і там ужо гаварылася аб лічбавым рублі. Цалкам магчыма гэта, дарэчы кажучы, перспектыва найбліжэйшага часу. Таму не трэба думаць і разважаць у катэгорыях XX стагоддзі і ў катэгорыях інтэграцыі еўрапейскай, якая адносіцца да індустрыяльнай эпохі", - сказала Новікава.
Таксама эксперты адзначылі, што ўсе працэсы, якія адбываюцца ў Саюзнай дзяржаве, маюць практычны характар – гэта павышэнне ўзроўню жыцця грамадзян.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Таксама на Sputnik:
Беларусь – Расія: як будзе развівацца інтэграцыя ў новым годзе
Колькі будзе каштаваць долар у 2023 годзе – прагноз ЕАБР
Зацверджана пагадненне аб тэхналагічных аперацыях у Саюзнай дзяржаве
Беларусь дамовілася аб пастаўках нафты з Расіі на 2023 год
Пуцін: у Расіі няма зацікаўленасці паглынаць Беларусь
