Разумела, што гэта канец, і развіталася з жыццём: пацярпелая аб землятрусе
17:57 08.02.2023 (абноўлена: 15:51 01.03.2023)
© AFP 2024 / REMI BANET
Падпісацца
Эксклюзіў
У Турцыі людзі працягваюць пакідаць свае разбураныя дамы і з’язджаюць з эпіцэнтра стыхійнага бедства да сваякоў.
У выніку наймагутнага землятрусу ў Турцыі вялікая колькасць жылых дамоў разбурана, на сценах з’явіліся моцныя трэшчыны, многія будынкі не прыдатны для пражывання. Людзі напалоханы і спяшаюцца выехаць. З-за гэтага на турэцкіх дарогах утварыліся шматкіламетровыя заторы. Некаторыя чакаюць сваёй чаргі ў аэрапортах – людзей вывозяць самалётамі.
Карэспандэнт Sputnik Кацярына Вераб’ёва пагутарыла з пацярпелымі і даведалася, як яны ратуюцца ад бедства.
У аэрапорце не было нават святла
Алена Чанакчы родам з Бішкека. Муж жанчыны – вайсковец, яго накіравалі служыць у Малацью на пяць гадоў. Праз некалькі месяцаў сям'я планавала пакінуць горад. Алена прызналася, што раней ім ужо даводзілася перажываць землятрус.
"Чатыры гады таму ў Малацьі таксама быў дастаткова моцны землятрус у 7 балаў. У мінулы раз наш дом выстаяў – утварылася літаральна некалькі трэшчын. Але было страшна. Я вельмі спадзявалася, што мы неяк пазбегнем паўтарэння гэтай гісторыі, бо праз некалькі месяцаў павінны былі з’яжджаць з Малацьі", - прызналася Алена.
Кватэра Алены і яе сям'і аказалася практычна цалкам разбураная, заставацца ў ёй далей было немагчыма
© Photo : Фото из личного архива Елены
Калі адбыўся новы землятрус, жанчына спала разам з мужам і дачкой, спрасонку не адразу зразумела, што адбываецца. Шматпавярховы дом захадзіў ходырам, а сям’я не магла нават устаць з ложка. Муж Алены саштурхнуў жонку і дачку на падлогу, дзякуючы чаму яны змаглі забрацца пад ложак, дзе прасядзелі практычна ўсе моцныя штуршкі. Потым пабеглі да пральнай машыны.
"Каля пральнай машыны мы паклалі сумку, вялікую падушку і коўдру – каб прыкрыць галаву, калі зноў пачне трэсці. Так мы прасядзелі хвілін 10 – адчулі 3 моцныя штуршкі. Пасля гэтага пачалі спускацца ў двор. Мы выбеглі практычна ў трусах, а на вуліцы снег. Прасядзелі ў машыне да 11 раніцы, усе нашы суседзі таксама пакінулі дом", - успамінае тое, што адбылося, Алена.
Пазней мужу жанчыны паведамілі, што ў вайсковай сталовай збіраюць вайскоўцаў і іх блізкіх. Сям’я паехала да месца збору, дзе і застала другі землятрус.
"Я спалохалася значна мацней, чым пры першым. Мы залезлі з дзіцем пад стол. Хоць будынак і аднапавярховы, яго вельмі моцна трэсла. Я разумела, што нам канец, і ўжо развіталася з жыццём", - успамінае жанчына.
Пасля паўторнага землятрусу прынялі рашэнне, што заставацца ў горадзе занадта небяспечна і вырашылі выехаць з Малацьі на машыне. Аднак з-за непагадзі – у горадзе ўжо тыдзень ідзе моцны снегапад – трасы знаходзяцца ў дрэнным стане. Акрамя гэтага, на дарогах шмат аварый, набыць бензін практычна немагчыма. Усе планавыя авіярэйсы адменены, бо аэрапорт моцна пацярпеў падчас землятрусу.
"Калі мы прыехалі ў аэрапорт, то не было святла, нічога не працавала. Мы прабылі тут 4 гадзіны і не змаглі ўлезці ў самалёты, якія вывозілі людзей. Нас унеслі ў спісак і мы прачакалі сваёй чаргі амаль суткі", - адзначыла Алена.
Алена з дачкой адправілася ў бяспечнае месца, муж застаўся ў горадзе, каб дапамагаць з разборам завалаў
© Photo : Фото из личного архива Елены
Дарэчы, гэтай ноччу ў Малацью прыбылі 4 самалёты з вайскоўцамі, якія будуць задзейнічаны на разборы завалаў пасля землятрусу. На гэтых жа самалётах вывезлі пацярпелых. Алена са сваёй дачкой вылецела ў Анкару, пасля чаго яна адправіцца да бацькоў мужа ў Стамбул. Сам муж застаўся ў Малацьі, дзе будзе дапамагаць устараняць наступствы землятрусаў.
Не маглі даехаць з-за мяцеліцы
Наталля Айдын пражывае ў вёсцы недалёка ад Аксарая. Сваякі яе мужа – сястра Фатма з двума дарослымі сынамі – прыехалі да іх з Аданы, якая моцна пацярпела падчас землятрусу.
"Я прачнулася незадоўга да таго, як пачало трэсці. Штуршкі адчула каля 3:00-3:30 раніцы. Упершыню ў жыцці адчувала падобнае. Вывела дзяцей на вуліцу, там было вельмі холадна, ішоў дождж. Мы ўсе былі напалоханыя і не ведалі, што нам рабіць. Вакол плакалі людзі", - распавяла Фатма.
З-за завеі сітуацыя на дарогах даволі складаная, у спробах выехаць людзі ствараюць кіламетровыя заторы
© Photo : Фото из личного архива Фатмы
Па словах жанчыны, у Адане шмат вышынных дамоў. Многія разбураны, а калі нават будынак уцалеў, то людзі баяцца заходзіць унутр. Таму многія сталі экстрана з’яжджаць да сваякоў у сельскую мясцовасць.
"На выездзе з Аданы мы прастаялі 3 гадзіны. На запраўках утварыліся кіламетровыя чэргі. У нашым рэгіёне заўсёды лета, снегу не бывае. Але па дарозе да сваякоў (гэты кірунак Кайсеры, Коньі, Аксарая) трапілі ў завіруху. З-за непагадзі на дарогах вельмі шмат аварый, машыны валяюцца на абочыне. Калі пад’язджалі да вёскі, то наогул адразу не змаглі праехаць – сваякі выклікалі грэйдар", - падзялілася Фатма.
У выніку турэцкая радня замест звычайных 2,5 гадзін дабіралася да вёскі каля 12 гадзін. Але самае галоўнае, што зараз Фатма і яе сыны адчуваюць сябе ў бяспецы. Хаця жанчына прызнаецца, што яшчэ трэба шмат часу, каб забыць увесь гэты жах.
"У суседніх дамах загінулі нашыя сябры, знаёмыя. Напрыклад, мой калега, з якім я працую на тэкстыльнай фабрыцы, пасля начной змены прыйшоў дадому і ўбачыў толькі руіны. Яго 13-павярховы дом упаў, унутры знаходзілася жонка і двое дзяцей. Яны загінулі. Нават не ведаю, як такое перажыць людзям. Цяпер у вёсцы мясцовыя жыхары збіраюць гуманітарную дапамогу, прыносяць дываны, коўдры, адзенне", - рэзюміравала Фатма.
Фатма і яе сыны дабіраліся да бяспечнага месца палову сутак
© Photo : Фото из личного архива Фатмы
Паводле апошніх звестак, колькасць ахвяр наймацнейшага землятрусу ў Турцыі вырасла да 8 574 чалавек. Пры гэтым колькасць ахвяр расце, больш за 38 тысяч чалавек пацярпелі, разбурана амаль 6,5 тысяч будынкаў, інфармацыя пастаянна абнаўляецца.
Беларусы працягваюць несці кветкі да пасольства Турцыі. А сёння раніцай атрад спецпрызначэння "ЗУБР" МНС Беларусі накіраваўся ў Турцыю для правядзення пошукава-выратавальных работ.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Таксама на Sputnik:
Землятрус магнітудай 4,8 зафіксаваны ў цэнтральнай частцы Турцыі
Беларускія ратавальнікі адправіліся ў Турцыю на разборы завалаў
Папугай папярэдзіў аб небяспецы: беларуска аб землятрусе ў Турцыі
Беларусь адправіла спецтэхніку і ратавальнікаў у Турцыю – відэа
Разбурэнні, ахвяры і выратаваныя – фота з месцаў землятрусу ў Турцыі і Сірыі
