"Спявае лета над барамі…": топ-10 вершаў пра самы цёплы час
![Туман над ракой Туман над ракой - Sputnik Беларусь, 1920, 14.06.2024](https://cdnn11.img.sputnik.by/img/07e6/06/06/1063327099_0:84:1800:1097_1920x0_80_0_0_49a05a259ce68c8aab9d41cb5ef60599.jpg)
![Лес, архивное фото Лес, архивное фото - Sputnik Беларусь, 1920, 07.06.2022](https://cdnn11.img.sputnik.by/img/102407/95/1024079552_0:0:3072:2048_1920x0_80_0_0_a88a1b00ad77f60806ec3ba436ac78f8.jpg)
Летам
Ну ж і волі, волі
У гаі за вёскай!
А цяплынь, цяплынь!
Весела на полі,
Слаўна пад бярозкай,
Хоць ты сядзь спачынь.
Пчолкі, матылёчкі,
Як сняжынкі тыя,
Мільгацяць вакол.
Жоўтыя пясочкі –
Крупкі залатыя,
Хоць бяры ў прыпол.
![Туман над рекой Туман над рекой - Sputnik Беларусь, 1920, 07.06.2022](https://cdnn11.img.sputnik.by/img/07e6/06/06/1063327164_0:0:1800:1200_1920x0_80_0_0_47bb78a0cf3260fd195eb3d113a82ca8.jpg)
Замалёўка
Спявае лета над барамі,
Сасёнкі струнамі звіняць,
Гамоніць поле каласамі,
Шапоча ў кветках сенажаць.
Шумяць вятры ў гаях напеўна.
Адна рачулка ў чаратах
Бурчыць, варочаецца гнеўна,
Бы мулка спаць на камянях.
А можа, з навіны ў ахвоту,
Пакуль міне плацінаў строй,
Так напрацуецца да поту,
Што пара раніцой над ёй.
![Детвора на пляже у реки Детвора на пляже у реки - Sputnik Беларусь, 1920, 07.06.2022](https://cdnn11.img.sputnik.by/img/101657/22/1016572237_0:0:2000:1333_1920x0_80_0_0_a8ed39560cb7cdccf87915ec186318fe.jpg)
З летніх малюнкаў
Коціцца, ўецца далінкай крыніца,
Б'ецца, плюскоча ў каменнях вадзіца,
Далей плыве і плюскоча.
Белымі грудкамі лёгшы на траўцы,
Хоча дзяўчынка к вадзіцы дастацца,
Губкамі чэрпнуці хоча.
Вольха лісткамі ёй шыю ласкоча,
Плюскатам рэчка смяецца у вочы,
Сонейка ўсіх абнімае.
Сонейка, рэчка, вольха, дзяўчына
Думцы ўсміхаюцца соладка, дзіўна,
Думка іх шчыра вітае…
![Жыта Жыта - Sputnik Беларусь, 1920, 10.06.2022](https://cdnn11.img.sputnik.by/img/103720/45/1037204587_0:0:1422:800_1920x0_80_0_0_63573fde4fcddc620ec9f19b23494b2c.jpg)
Пачатак лета
Жывыя хвалі аксаміту
Плывуць за сонны небакрай.
У дудачкі звілося жыта
На добры, кажуць, ураджай.
Дасвеццем росы-самасеі
Згінаюць травы да зямлі.
He верыцца, што тут завеі
З вятрамі сцюжнымі гулі.
Усё расце, усё буяе
І на палетках і ў бары.
Ад сілы сокаў набракае
На ўзлеску нават пень стары.
Яго жывая карнявіна
Яшчэ не ведае спачыну.
I вось прыйшоў ён, дзень такі –
Адгонцы пырснулі ў бакі.
I сам я на пачатку лета,
Бліжэй да маладога свету,
А да цябе – яшчэ бліжэй.
Ты не журыся, усміхніся.
Глядзі, пяшчотна як спляліся
Адгонцы нашых мар-надзей.
Былі й між нас яны, завеі,
I замаразкі дзе-нідзе.
Але каханне
He слабее,
Цвіце каханне
I расце.
![Цветут васильки Цветут васильки - Sputnik Беларусь, 1920, 07.06.2022](https://cdnn11.img.sputnik.by/img/101527/79/1015277987_0:0:3098:2048_1920x0_80_0_0_b519be81fe95da7a31141c92a52784c4.jpg)
Васілёк
Стаіць,
Выглядаючы з жыта,
Як зорачка-знічка
Здалёк,
Што ўпала
Іскрынкай
З блакіту,
Палеткаў краса –
Васілёк.
Калі расцвітае
Цуд гэты,
На полі
Яшчэ гарачэй,
Буяе,
Квітнеецца лета
I фарбы прыроды –
Ярчэй.
Стаіць,
Паглядае з пагорка,
Як зорка
Аднекуль здалёк,
Часцінка
Любімай старонкі,
Часцінка зямлі –
Васілёк.
![Грибы в корзине Грибы в корзине - Sputnik Беларусь, 1920, 07.06.2022](https://cdnn11.img.sputnik.by/img/103082/14/1030821487_0:0:3888:2592_1920x0_80_0_0_8baec6a7c746484fffb44b4a169d9740.jpg)
Раніца
Раней за сонца ўстану рана я.
Крылаты золак не прасплю.
Прайдуся сцежкамі крамянымі
ўлюбёная ў сваю зямлю.
Прамчуся за вятрамі гонкімі
па бальшаках зялёных…
Сустрэне луг мяне рамонкамі,
прастор – блакітам лёну.
Барок грыбамі запалоніць:
лісіц – грабі ў ахапку.
Грыб шчыры ў ветлівым паклоне
скідае долу шапку.
Паміж чарніцамі-насмешкамі
згубілася ў гушчэчы.
Унізе пахне сыраежкамі,
а зверху птах шчабеча.
Паабтрасаю росы з голля –
абудзіцца рака.
Абсыпана буйное поле
званочкам жаўрука.
Ліецца песня з-пад блакіту
на маладое жыта,
жывое серабро нібыта,
густой расой абмыта…
Зямля шчырэе і смяецца,
спявае радасць лету.
I можна абысці, здаецца,
за сонейкам паўсвету.
![Поля с подсолнухами в Краснодарском крае Поля с подсолнухами в Краснодарском крае - Sputnik Беларусь, 1920, 07.06.2022](https://cdnn11.img.sputnik.by/img/07e4/07/11/1045197228_0:0:3071:2048_1920x0_80_0_0_d910c80593bc02083e0822d8d172fe85.jpg)
Сланечнік
Сланечнік нам у твары дыхаў цветам,
Мы прыкмячалі летняю парой,
Што ён штодня за сонцам водзіць следам
Сваёй агністай, жаркай галавой.
Што першым ён прыход яго вітае,
I апаўдні стаіць з ім твар у твар,
I першым долу галаву схіляе,
Як коціцца за лес агністы шар.
Ён так стамляўся, наш сланечнік мілы,
Так шчыра сустракаў ён ночы цень,
Як быццам два крутыя небасхілы
Ён разам з сонцам абышоў за дзень.
У сінь нябёсаў просіцца нямала
Сланечнікаў. I верыць я гатоў,
Што гэта сонца так параскідала
Па ўсёй зямлі малых сваіх братоў.
![Радуга в Минске Радуга в Минске - Sputnik Беларусь, 1920, 07.06.2022](https://cdnn11.img.sputnik.by/img/07e4/07/17/1045246316_0:0:1600:1200_1920x0_80_0_0_d7d8361e22117748bdbfd32d319f677e.png)
Маланкі неба пакрамсалі…
Маланкі неба пакрамсалі,
Зарніцы ціха адгулі,
I там, дзе воблакі звісалі,
Блакіт, як неба, на зямлі.
Пасля дажджу на луг, на поплаў
Праменняў хлыне вадаспад,
I пад смугой вячэрняй, цёплай
Пяшчотна млее далягляд.
Палеткі дыхаюць, як дзеці.
I я шчасліва ім-кажу:
– Спачніце. Заўтра на дасвецці
Я вас абдымкам разбуджу.
![Рассвет на лугу Рассвет на лугу - Sputnik Беларусь, 1920, 07.06.2022](https://cdnn11.img.sputnik.by/img/07e6/06/06/1063327362_0:0:1800:1200_1920x0_80_0_0_0225a6d80c8c7e601024717069bbcba8.jpg)
Пайду я ў сонечнае лета…
Пайду я ў сонечнае лета,
Нап'юся хмельнага настою, –
Настою сонца з цёплым ветрам,
З травой духмянай лугавою.
Пайду, паслухаю далёкі
Званок срабрысты жаўруковы,
I шэпт сухі ў зеніце спёкі,
I спеў лагодны раўчуковы.
Убачу вочы ў бліскавіцах,
У залатых іскрынках смеху.
Між верб, расплеценых і ніцых,
Знайду рассыпанае рэха.
…Іду я ў сонечнае лета, –
К стагам пад хусткай снегавою,
К стагам, прапахлым цёплым ветрам,
Расой крамянай лугавою.
![Рулоны сена на поле Рулоны сена на поле - Sputnik Беларусь, 1920, 07.06.2022](https://cdnn11.img.sputnik.by/img/104491/11/1044911168_0:0:3126:2048_1920x0_80_0_0_1a8198e097e952ebac1d83d8b6adf66d.jpg)
Спёка
Паветра трымціць
Над кустамі, над лугам;
Стаіўся дзяркач у асоках,
Павіснуў каршун
Пад нябачаным кругам –
Спёка.
Паглядваюдь коні
На грудзе мурожным,
Што цені кароткія збоку.
Касілкі ускінулі
Крыллі трывожна –
Спёка.
Прыселі касцы
На апошнім гектары
Спачыць пад вярбой высокай
I шапкамі пот
Выціраюць на тварах –
Спёка.
А сена так пахне,
Хоць чай ты заварвай
З яго пад бусліны клёкат.
I кнігаўкі плачуць,
На рыжых выгарах –
Спёка.
Падняўшы галовы,
Стагі зазірнулі
Увысь – ці няма аблокаў?
I ў люстра ракі
Разам з сонцам нырнулі –
Спёка!