Лукашэнка раскрыў дэталі перагавораў з Прыгожыным
16:08 27.06.2023 (абноўлена: 18:02 27.06.2023)
© Photo : пресс-служба президента БеларусиАляксандр Лукашэнка ўручыў генеральскія пагоны вышэйшаму афіцэрскаму складу
![Аляксандр Лукашэнка ўручыў генеральскія пагоны вышэйшаму афіцэрскаму складу Аляксандр Лукашэнка ўручыў генеральскія пагоны вышэйшаму афіцэрскаму складу - Sputnik Беларусь, 1920, 27.06.2023](https://cdnn11.img.sputnik.by/img/07e7/06/1b/1077006075_111:0:1240:635_1920x0_80_0_0_6fcd6239168914107792f2fec6fbab92.jpg)
© Photo : пресс-служба президента Беларуси
Падпісацца
Па словах беларускага прэзідэнта, ён угаварыў Пуціна не спяшацца з жорсткім рашэннем у дачыненні да Прыгожына і правесці перагаворы.
МІНСК, 27 чэр – Sputnik. Прэзідэнт Расіі Уладзімір Пуцін паведамляў прэзідэнту Беларусі Аляксандру Лукашэнку ў суботу, 24 чэрвеня, што сітуацыя на фронце "лепшая, чым калі-небудзь". Аб гэтым беларускі лідар расказаў на сустрэчы з сілавікамі і журналістамі.
"Задаў (Пуціну - Sputnik) некалькі пытанняў, у тым ліку і пра супрацьдзеянне гэтаму, і зразумеў, што сітуацыя складаная. Не буду канкрэтызаваць гэтую частку размовы", - цытуе Лукашэнку агенцтва БелТА.
Паводле слоў Лукашэнкі, 24 чэрвеня ў 8:00 да яго паступіла "трывожная інфармацыя аб сітуацыі ў Расіі".
"Праз ФСБ і наш Камітэт дзяржбяспекі, генерала Церцеля мне дакладваюць: прэзідэнт Пуцін хоча звязацца. Калі ласка. Дамовіліся ў паўдзесятага, што мы перагаворым у любы зручны для яго час. Калі ў 10 ён выступіў, у 10:10 патэлефанаваў і падрабязней праінфармаваў мяне аб сітуацыі, якая адбываецца ў Расіі", - распавёў Лукашэнка.
Беларускі прэзідэнт адзначыў, што Пуцін прыняў "жорсткае рашэнне".
"Я таксама зразумеў: прынята жорсткае рашэнне, яно і прагучала падтэкстам у выступленні Пуціна, – мачыць. Я прапанаваў Пуціну не спяшацца. Давай, кажу, пагаворым з Прыгожыным, з камандзірамі яго. На што ён мне сказаў: "Слухай, Саша, дарэмна. Ён нават трубку не бярэ, ні з кім размаўляць не хоча", - растлумачыў беларускі прэзідэнт.
Лукашэнка на гэта адказаў расійскаму калегу, што худы мір лепшы за любую вайну.
"Не спяшайся. Я паспрабую з ім звязацца. Ён у чарговы раз кажа: "Гэта бескарысна". Я кажу: "Добра, пачакай. Недзе мы размаўлялі, напэўна, з паўгадзіны. Пасля ён мяне праінфармаваў, што на фронце. Памятаю яго словы: "Ты ведаеш, а на фронце, як ні дзіўна, лепш, чым калі-небудзь было". Я кажу: "Вось бачыш, не ўсё так сумна", - раскрыў Лукашэнка дэталі размовы з Пуціным.
Затым беларускаму боку, паводле слоў Лукашэнкі, удалося ўстанавіць да сярэдзіны дня 24 чэрвеня тры каналы, па якіх "можна было размаўляць з Растовам".
Абараняць Маскву
Лукашэнка, паводле яго слоў, заявіў Прыгожыну падчас перагавораў, што беларускія вайскоўцы гатовы абараняць Маскву.
"Доўга я яго пераконваў. І ў канцы сказаў: "Ведаеш, ты як хочаш можаш паступаць. Але на мяне не крыўдуй. Брыгада падрыхтавана да перакідкі ў Маскву. І, як у 41-м (ты ж кніжкі чытаеш, адукаваны, разумны чалавек), мы будзем абараняць Маскву. Бо дадзеная сітуацыя не толькі ў Расіі. Гэта і не толькі таму, што гэта вось наша Айчына. А таму што, крый божа, вось гэтая смута пайшла б па ўсёй Расіі, а перадумовы для гэтага былі каласальныя, наступнымі былі мы", - распавёў прэзідэнт Беларусі.
На яго думку, калі б мяцеж у РФ працягнуўся, гэта паўплывала б на Беларусь, важна было распачаць сумесныя з Расіяй дзеянні.
"Я кажу: "Жэня, ніхто табе ні Шайгу, ні Герасімава, нікога не аддасць, асабліва ў гэтай сітуацыі. Ты ж ведаеш Пуціна не менш, чым я. Па-другое, ён з табой не тое што сустракацца – па тэлефоне размаўляць не будзе ў сілу гэтай абстаноўкі". Маўчыць. "Але мы хочам справядлівасці! Нас жадаюць падавіць! Мы пойдзем на Маскву!" Я кажу: "На паўдарозе цябе проста як клапа раздушаць. Нягледзячы на тое, што войскі (мне пра гэта Пуцін доўга казаў) адцягнуты на адпаведным фронце". Падумай, кажу, пра гэта. "Не" – такая вось эйфарыя", - сказаў Лукашэнка.
Ведаю працу Шайгу
На думку Лукашэнкі, раней пачалася канкурэнцыя паміж арміяй і ПВК. Затым "міжасобасны канфлікт паміж вядомымі людзьмі перарос у гэтую бойку". Калі гэтая сітуацыя пачала развівацца, Лукашэнка і Пуцін, паводле слоў беларускага прэзідэнта, упусцілі сітуацыю, "думалі, што разыдзецца".
"І вось тут я яшчэ хацеў бы зрабіць адну заўвагу, чаму сваім СМІ, прэс-сакратару даручыў ні ў якім разе не рабіць з мяне героя, з Пуціна і Прыгожына. Таму што мы прашлёпалі гэтую сітуацыю. Мы яе ўпусцілі. А потым, калі яна пачала развівацца, мы бачылі і думалі, што разыдзецца, – і я, і Пуцін. Але я ў меншай ступені, калі ўжо шчыра казаць. Але тым не менш. А яно не разышлося. І сутыкнуліся практычна два чалавекі, якія ваявалі на фронце. Я, зноў жа, у гэтай тэме, у гэтым катле быў увесь час. Я ведаю працу Шайгу. Незаслужана яго часам крытыкуюць", - адзначыў беларускі лідар.
Лукашэнка падкрэсліў, што не можа паведаміць СМІ, пра што яны размаўлялі з Шайгу.
"Мы з ім вялі вельмі сур’ёзныя перагаворы. Генерал Хрэнін (кіраўнік мінабароны Беларусі Віктар Хрэнін – Sputnik) з ім сустракаўся не аднойчы, і мы спакойна падтрымлівалі чым маглі, а маглі шмат, і шмат зрабілі. І ў гэтых адносінах Шайгу нямала зрабіў. Гэта значыць, ён заняў сваю нішу там, дзе ён можа чагосьці зрабіць", - узгадаў прэзідэнт Беларусі.
Што было ў Растове
Лукашэнка таксама распавёў, што па сваіх каналах, у тым ліку ад КДБ, атрымаў інфармацыю аб тым, што ПВК "Вагнер" занялі штаб вайсковай акругі ў Растове-на-Доне.
"Тут жа ў СМІ: "Ай-ай-ай, захапілі, ужо марадзёрства, яшчэ чагосьці", - укідваюць. Асабліва ўкраінцы адтапталіся на гэтай тэме. Я пачаў удакладняць. Я кажу: "Ты чаго, забіў кагосьці там з грамадзянскіх, вайскоўцаў, якія табе не супрацьстаялі?" – "Аляксандр Рыгоравіч, я вам клянуся, мы нікога не кранулі. Мы занялі штаб. Вось я тут знаходжуся". І гэта аказалася праўдай. Гэта было вельмі важна. Заўважце, гэта было вельмі важна, што яны, зайшоўшы ў Растоў, нікога не кранулі", - успомніў прэзідэнт Беларусі.
Ніякага кровапраліцця
"Размаўляючы ў другі ці трэці раз, я яго папярэдзіў. Я ўжо бачу, што ён гатоў адступіцца, але я яго папярэджваю: "Яўген, ніякага кровапраліцця. Як толькі ты знарок, незнарок заб’еш хоць аднаго чалавека, асабліва грамадзянскага, – усё, ніякіх з табой перагавораў не будзе, і я з табой размаўляць не буду". Ён мне пакляўся. У нас, кажа, такой мэты няма, і я вам клянуся, што гэтага не будзе", - сказаў Лукашэнка.
Прэзідэнт расказаў, што перагаворы ішлі на працягу дня, і было шэсць або сем раундаў.
"Я сваю пазіцыю выказаў. Больш не тэлефанаваў яму. Шэсць разоў, па-мойму, ён ужо на мяне выходзіў. Раіўся, прапаноўваў і іншае. Калі ён мне сказаў: "Аляксандр Рыгоравіч, я не буду патрабаваць ад Прэзідэнта, каб ён аддаў Шайгу і Герасімава, і сустрэчы нават прасіць не буду", я кажу: "Ну і добра. Гэта вельмі добры крок. Не трэба ў гэтай сітуацыі, напружваючы абстаноўку, патрабаваць невыканальнае", - адзначыў беларускі прэзідэнт.
Потым Лукашэнка дамовіўся аб тым, каб Прыгожын спыніў калону сваіх байцоў.
"Я кажу: "Вось ты ўяўляеш, я – прэзідэнт. Ты ў мяне міністар абароны. І нейкі бандыт…" –"Я не бандыт" –"Я кажу да прыкладу: нейкі бандыт патрабуе аддаць Хрэніна з Гулевічам. Я ніколі на гэта не пайду. Сам загіну, але не пайду" – "Так, я разумею" – "Раз разумееш, давай дзейнічаць". Ён кажа: "Скажыце, што цяпер?" Я кажу: "Трэба спыніць калону". Гэта значыць ён пайшоў на тое, каб дамаўляцца", - распавёў кіраўнік беларускай дзяржавы.
Прыгожын, паводле слоў Лукашэнкі, прасіў дазволу параіцца са сваімі камандзірамі.
"Ён кажа: "Дазвольце мне сабраць камандзіраў і параіцца". Я кажу: "Вядома, ты з імі парайся, каб потым цябе не абвінавацілі", - успомніў прэзідэнт.
Гарантыі для Прыгожына
Потым кіраўнік ПВК "Вагнер" прыняў усе ўмовы, якія яму прапанаваў Лукашэнка. Прэзідэнт расказаў усё ў падрабязнасцях.
"У пятай гадзіне вечара ён мне патэлефанаваў і кажа: "Аляксандр Рыгоравіч, я прымаю ўсе вашыя ўмовы. Але... Што мне рабіць? Спыняемся – яны пачнуць нас мачыць". Я кажу: "Не пачнуць. Я табе гарантую. Гэта я бяру на сябе". У кантакце былі з кіраўніцтвам Расіі, ФСБ займалася ў асноўным гэтым пытаннем, з Бортнікавым. Я проста настойліва прасіў гэтага не рабіць. Бортнікаў разумны чалавек. Ён сказаў: "Аляксандр Рыгоравіч, ну я ж не дурань, я жа разумею, што можа быць", - распавёў Лукашэнка.
Паводле слоў Лукашэнкі, Прыгожын баяўся, што ў расійскіх сілавікоў будзе спакуса ўдарыць па калоне "Вагнера", калі яна спыніцца.
"Калі яны недзе спыняцца, калона сціснецца… Яна ў кучу збярэцца… Каб не было, ведаеце, жадання і спакусы ўзяць і яе тут накрыць. Паабяцалі: гэтага не будзе. Я і сказаў Прыгожыну: "Гэта – гарантыя" – "Што далей?" – "Аж да таго, што я выведу цябе ў Беларусь і гарантую табе поўную бяспеку. І тваім рабятам, якія вось сюды прасунуліся гэтай калонай" – "Так, я вам веру. Я веру". – "Добра, у гэтым напрамку будзем дзейнічаць", – дадаў прэзідэнт Беларусі.
Прыгожын у Беларусі
Кіраўнік дзяржавы таксама паведаміў, што Прыгожын цяпер знаходзіцца ў Беларусі. Па словах Лукашэнкі, кіраўнік ПВК сёння прыбыў у рэспубліку самалётам. Яму былі дадзены гарантыі бяспекі, якія былі абяцаны з боку прэзідэнта Расіі Уладзіміра Пуціна.
Беларускі лідар паведаміў, што прапанаваў Прыгожыну дапамогу ў тым, каб "перакантавацца і іншае" ў Беларусі, зразумела, за кошт ПВК.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Чытайце таксама:
Цэлая брыгада была гатова да перакідкі ў Расію – Лукашэнка
Лукашэнка заклікаў не баяцца "вагнераўцаў", а пераймаць вопыт
Пуцін вайскоўцам: вы фактычна спынілі грамадзянскую вайну