Беларуска-расійская рыбалоўная флатылія можа быць створана ў Крыме
13:02 11.07.2023 (абноўлена: 18:10 11.07.2023)
© Sputnik / Константин Михальчевский
/ Падпісацца
Беларускаму боку таксама могуць быць цікавыя крымскія парты – у Феадосіі і Керчы для перавалкі калійных удабрэнняў.
МІНСК, 11 ліп – Sputnik. Беларусь і Расія могуць стварыць сумесную рыбалоўную флатылію, заявіў часова выконваючы абавязкі пастаяннага прадстаўніка Рэспублікі Крым пры прэзідэнце Расійскай Федэрацыі Міхаіл Саломенцаў журналістам у Мінску, адказваючы на пытанне Sputnik.
"Яшчэ адна цікавая тэма, якую мы абмяркоўваем – гэта стварэнне ў будучым сумеснай беларуска-расійскай рыбалоўнай флатыліі для лоўлі ў Чорным і Міжземным морах, а таксама на заходнім узбярэжжы Афрыкі", - сказаў ён.
Паводле яго слоў, на заходнім узбярэжжы Афрыкі найбуйнейшыя месцы лоўлі і афрыканскія краіны зацікаўлены ў гэтым. "Напярэдадні форуму "Россия – Африка" гэтая тэма абмяркоўваецца і будзем яе абмяркоўваць на форуме".
Часова выконваючы абавязкі пастаяннага прадстаўніка Рэспублікі Крым пры прэзідэнце Расійскай Федэрацыі Міхаіл Саломенцаў
© Sputnik / Виктор Толочко
Гаворачы аб перспектыўнасці гэтага праекта для Беларусі, Саломенцаў падкрэсліў, што ў Беларусі ёсць вялікія магчымасці для перапрацоўкі рыбы.
Крымскія парты
Саломенцаў таксама адзначыў, што Крым гатоў выдзеліць свае парты для перавалкі беларускіх тавараў і прадукцыі, падкрэсліўшы, што бакі зацікаўлены ў павелічэнні тавараабароту.
"Мы пастаўляем у Беларусь менш, чым Беларусь пастаўляе нам, але ў нас ёсць вялікія перспектывы па развіцці гэтага тавараабароту", - сказаў ён.
© Sputnik / Виктор Толочко
На яго думку, для гэтага трэба развіваць усе лагістычныя магчымасці, у тым ліку і крымскія парты.
"(...) задзейнічаць парты Крыма, марскія вароты Расіі, Саюзнай дзяржавы. (…) гэта Феадасійскі порт і Керчанскі порт, яны маглі б удзельнічаць у перавалцы грузаў, у тым ліку і беларускіх", - заявіў Саломенцаў.
Пры гэтым ён падкрэсліў, што гэта могуць быць беларускія калійныя ўдабрэнні, прадукцыя беларускай нафтахіміі.
Гаворачы аб перспектыўнасці выкарыстання крымскіх партоў, Саломенцаў адзначыў, што лагістыка можа быць наступнай: "Далей – на поўдзень праз Чорнае мора, Міжземнае мора, на Паўночную Афрыку, на краіны Персідскага заліва, далей у Азію".
Крымская ружа і лаванда
Крым гатоў пастаўляць у Беларусі і такія ўнікальныя прадукты, як крымская ружа, лаванда і, вядома ж, знакамітыя крымскія віны.
"У нас шмат напрамкаў. У нас ёсць лаванда, эксклюзіўны прадукт, які мы гатовы пастаўляць, у нас ёсць крымская ружа, гэта таксама рэдкі прадукт, які вялікім попытам карыстаецца. І я ўжо не гавару пра крымскае віно", - сказаў Саломенцаў.
Ён адзначыў, што на Дні Крыма ў Беларусі прывезены эксклюзіўныя сарты крымскіх він.
"Гэтая галіна (вінаробная - Sputnik) вельмі бурна развіваецца ў Крыме, растуць аб'ёмы, расце колькасць гаспадарак, якія вырошчваюць вінаград", - сказаў ён.
Саломенцаў таксама асабліва падкрэсліў, што беларускіх турыстаў чакаюць у Крыме.
"Цяпер вырашаецца пытанне наладжвання лагістычных ланцужкоў для беларускіх турыстаў, я думаю, у бліжэйшы час гэта будзе прасцей вырашаць, і з улікам прамых рэйсаў з Беларусі ў Крым, і чыгуначныя зносіны. І я думаю, што колькасць беларускіх турыстаў павялічыцца кратна", - сказаў ён.
Паводле яго слоў, для гэтага ёсць усе магчымасці, у тым ліку і з улікам таго, што ёсць беларускія санаторыі ў Крыме.
Саломенцаў таксама выступіў на дзелавой секцыі ў Доме Масквы. Пры гэтым ён падкрэсліў, што для Расіі Беларусь з'яўляецца найбліжэйшым саюзнікам і краінам трэба развіваць яшчэ больш цесныя сувязі.
Дні Рэспублікі Крым у Рэспубліцы Беларусь праходзяць 10-12 ліпеня ў Доме Масквы. Афіцыйную дэлегацыю расійскага рэгіёна ўзначальвае часова выконваючы абавязкі пастаяннага прадстаўніка Рэспублікі Крым пры прэзідэнце Расійскай Федэрацыі Міхаіл Саломенцаў.
Удзел у мерапрыемствах таксама бяруць прадстаўнікі адміністрацыі горада Ялта і Сакскага раёна Рэспублікі Крым, расійскія эксперты, прадстаўнікі музейнай супольнасці, грамадскіх і дзелавых колаў Крыма.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Чытайце таксама:
Кіраўнік Крыма: нягледзячы на санкцыі, мы адчуваем шырокую падтрымку
Лукашэнка хоча перанакіраваць частку калію на порт у Мурманску
